Qytaıdan eki alyp panda AQSh-qa jetkizildi
ASTANA. KAZINFORM — Qytaıdan Pın Pın jáne Fý Shýan esimdi eki alyp panda túrdi saqtaýǵa baǵyttalǵan jańa halyqaralyq baǵdarlama aıasynda Atlantaǵa jetkizildi, dep habarlaıdy Zoo Atlanta.
Janýarlar 27 qyrkúıekte arnaıy júk ushaǵymen Hartsfıld-Djekson halyqaralyq áýejaıyna jetkizildi.
Pandalar Atlanta haıýanattar baǵy men Qytaıdyń jabaıy tabıǵatty qorǵaý qaýymdastyǵy arasynda alyp pandalardy saqtaý salasyndaǵy halyqaralyq yntymaqtastyq týraly jańa kelisim aıasynda AQSh-qa ákelindi.
Osylaısha Atlanta haıýanattar baǵy alyp pandalar bar AQSh-taǵy úsh nysannyń birine aınaldy. Sondaı-aq ol eldiń ońtústik-shyǵysyndaǵy alyp pandalar ustalatyn jalǵyz haıýanattar baǵy bolyp otyr.
Pın Pın esimdi erkek panda 2020 jylǵy 17 naýryzda, al Fý Shýan esimdi urǵashy panda sol jyldyń 18 qazanynda dúnıege kelgen. Ekeýi de Chendý qalasyndaǵy alyp pandalardy kóbeıtý jónindegi zertteý bazasynda týǵan.
Ázirge kelýshiler pandalardy kóre almaıdy. Olar shamamen bir aı boıy haıýanattar baǵynyń jańa keshenindegi arnaıy aımaqta karantınde bolady. Keıin Atlanta haıýanattar baǵy janýarlardy kelýshilerge qashan kórsetetinin habarlaıdy.
Atlanta haıýanattar baǵynyń Qytaımen alyp pandalardy saqtaý jónindegi alǵashqy kelisimi 1999 jyldan 2024 jylǵa deıin kúshinde boldy. Osy 25 jyl ishinde Atlantada Lýn Lýn men ıAn ıAn jubynan 7 panda tóli týǵan.
2024 jyldyń qazanynda Lýn Lýn, ıAn ıAn jáne olardyń kishi tólderi ıA Lýn men Sı Lýn Qytaıǵa qaıtaryldy.
Atlanta haıýanattar baǵynyń málimetinshe, jabaıy tabıǵatta shamamen 1,9 myń alyp panda qalǵan. 2016 jyly Halyqaralyq tabıǵatty qorǵaý odaǵy bul túrdiń mártebesin «joıylyp ketý qaýpi bar» sanatynan «osal túr» sanatyna ózgertti.
Buǵan deıin Qytaı halyqaralyq yntymaqtastyq aıasynda AQSh-qa eki alyp panda jiberetini týraly jazǵan bolatynbyz.
