Qytaıdaǵy Dúnıejúzilik oıyndar kezinde ıtalııalyq sportshy qaıtys boldy
ASTANA.KAZINFORM — 7-17 tamyz aralyǵynda Qytaıdyń Chendý qalasynda ótip jatqan XII Dúnıejúzilik oıyndar kezinde ıtalııalyq sportshy Mattıa Debertolıs qaıtys boldy, dep habarlaıdy Kazinform.
Halyqaralyq Dúnıejúzilik Oıyndar qaýymdastyǵy (IWGA), Chendý 2025 Dúnıejúzilik oıyndardy uıymdastyrý komıteti (LOC) jáne Halyqaralyq baǵdarlaý federatsııasy (IOF) birlesken málimdemede sportshynyń 2025 jylǵy 8 tamyz, juma kúni tańerteń erler arasyndaǵy orta qashyqtyqty baǵdarlaý jarysy kezinde es-tússiz jatqan jerinen tabylǵanyn habarlady.
Qytaıdaǵy jetekshi medıtsınalyq mekemelerdiń birinde jedel bilikti medıtsınalyq kómek alǵanyna qaramastan, ol 2025 jyly 12 tamyzda qaıtys boldy. Uıymdastyrýshylar sportshynyń otbasy men jaqyndaryna, sondaı-aq búkil álemdik baǵdarlaý qaýymdastyǵyna qaıǵylaryna ortaqtasyp kóńil aıtady.
Málimdemede IWGA, LOC jáne IOF ıtalııalyq sportshy Mattıa Debertolıstiń otbasyna jáne baǵdarlaý qaýymdastyǵyna jan-jaqty qoldaý kórsetýdi jalǵastyratyny aıtylǵan.
Esterińizge sala keteıik, Dúnıejúzilik oıyndar — Olımpıada oıyndarynyń baǵdarlamasyna enbegen sport túrlerinen halyqaralyq keshendi jarystar. Olar 1981 jyldan bastap tórt jylda bir ret ótkizilip keledi. Bıyl Qytaıdyń materıktik aımaǵynda alǵash ret ótkizilip jatyr.
Buǵan deıin Qytaıdyń Chendý qalasynda 2025 jylǵy Dúnıejúzilik oıyndar resmı túrde ashylǵanyn jazǵan bolatynbyz.