Qytaıdaǵy alapat sel: 43 adam qaza boldy, 519 adam habar-osharsyz ketti
ASTANA. KAZINFORM — 26 tamyzda Qytaı men Nepal shekarasyndaǵy Sıtszan avtonomııalyq aýdanyndaǵy Gırong ótkizý beketi mańynda bolǵan selden 43 adam qaza tapqany rastaldy, dep habarlaıdy Sınhýa.
Senbi kúni saǵat 18:00-degi málimet boıynsha, taǵy 519 adam habar-osharsyz ketkender qatarynda ekeni anyqtaldy. Bul týraly jeksenbide jergilikti tótenshe jaǵdaılarǵa den qoıý shtaby málimdedi.
Qytaılyq jáne sheteldik jýrnalıster qatysqan baspasóz máslıhatynda habar-osharsyz ketkenderdiń arasynda 23 eldiń 261 azamaty bar ekeni aıtyldy.
Baspasóz máslıhaty sheteldik BAQ ókilderi demalys kúnderi Gırong ótkizý beketi mańyndaǵy sel júrgen aýmaqqa barǵannan keıin ótti.
Nepal aýmaǵyndaǵy bıik taýly muzdyqtyń opyrylýynan keıin bolǵan joıqyn selden soń Qytaı aýqymdy izdeý-qutqarý jumystaryn bastady.
Senbi kúni saǵat 18:00-degi jaǵdaı boıynsha Qytaı tarapy qutqarý jumystaryna 2500-den astam adam men 500-den astam tehnıka jumyldyrǵan. Sondaı-aq drondar myńnan astam ret ushyrylyp, áýeden 5,43 tonna júk jetkizilgen.
Budan bólek, Gırong ýeziniń bıligi aýmaqta qalyp qoıǵan Nepaldyń shekaralas aýdandarynyń 1720 turǵynyna kómek kórsetti. Gırongta jumys isteıtin nemese kásippen aınalysatyn kóptegen nepaldyq azamat sel ádette Qytaı shekarasynan ótý úshin paıdalanatyn ótkizý beketin qıratyp ketkennen keıin el aýmaǵynan shyǵa almaı qalǵan.
Shtab ókilderiniń málimetinshe, Qytaı tabıǵı apattardyń aldyn alý jónindegi aqparat almasý tetigi arqyly Nepalǵa meteorologııalyq jáne gıdrologııalyq jaǵdaı, sondaı-aq muzdyqtar men muzdyq kólderdiń jaı-kúıi týraly jańartylǵan derekterdi kún saıyn berip otyr.
Aıta keteıik, Nepaldaǵy joıqyn sý tasqynynan qaza tapqandar sany 1294 adamǵa jetip, taǵy 5053 adammen baılanys ornatylmaı otyrǵany habarlandy. Sondaı-aq, aımaqta áli de kóshkin qaýpi bar.
BUU Nepaldaǵy sý tasqynynan zardap shekkenderge kómek kórsetý úshin 49,6 mln dollar surady.
Eldegi joıqyn sý tasqyny bolǵannan keıin 10 kún ótken soń qutqarýshylar úıindi astynan eki adamdy tiri tapty.
Nepaldaǵy sý tasqynynan joǵalyp ketken týrıster baılanysqa shyǵa bastady.
Osyǵan deıin óńirdegi joıqyn tasqyn ǵaryshtan túsirilgenin jazǵan edik.
