Qytaıdaǵy 5 elektromobıldiń quny AQSh-taǵy bir kólikpen birdeı
ASTANA. KAZINFORM — Qytaı avtonaryǵyndaǵy gıperbásekelestik baǵanyń kúrt tómendeýine ákeldi. AQSh-taǵy ortasha jańa kóliktiń baǵasyna BYD jáne Geely kompanııalarynan qytaılyq bes jańa elektromobıl satyp alýǵa bolady, dep habarlaıdy Kyodo.
Osy aptada ashylǵan Beıjiń avtosalony álemdegi eń iri avtokólik naryqtary — Qytaı men AQSh arasyndaǵy baǵa alshaqtyǵynyń aýqymyn aıqyn kórsetti.
Qytaıda ishki básekelestiktiń nátıjesinde jańa kólikterdiń baǵasy basqa eldermen salystyrǵanda áldeqaıda tómendedi.
Kelley Blue Book málimetteri boıynsha naýryzda AQSh-ta jańa kóliktiń ortasha baǵasy 51 456 dollar boldy. DCar platformasyna sáıkes, Qytaı naryǵy baǵasy 25 000 dollardan tómen 200-den astam elektr jáne gıbrıdti modelderdi usynady.
Olardyń arasynda Qytaıda eń kóp satylatyn modelderdiń biri — baǵasy shamamen 10 060 AQSh dollarynan bastalatyn Geely EX2 kompaktty elektromobıli bar. Sondaı-aq, qalalyq saparlarǵa arnalǵan bıýdjettik Wuling Hongguang Mini EV baǵasy 6 560 AQSh dollarynan bastalady.
Atap ótýge turarlyq taǵy úsh model — BYD kompanııasynyń Seagull, Yuan UP jáne Qin Plus DM elektromobılderi. Olardyń baǵasy shamamen 10-12 myń dollardan bastalady. BYD sońǵy jyldary Qytaıdyń arzan elektromobılder naryǵynda jetekshi kompanııa bolyp otyr. Munda kóliktiń birneshe júz myńy satylǵan.
Reuters agenttiginiń DCar derekteri negizinde júrgizilgen taldaýy Qytaıdaǵy eń kóp satylatyn bes elektromobıldiń baǵasy AQSh-taǵy bir ortasha kóliktiń baǵasyna teń ekenin kórsetti. Bul modelder AQSh avtosalondarynda ázirge satylmaıdy.
Sarapshylar AQSh naryǵymen baǵa alshaqtyǵy tek ulǵaıa berýi múmkin dep otyr.
Osyǵan deıin Beıjińde álemdegi eń iri halyqaralyq avtokórme ashylǵany týraly jazǵan bolatynbyz.
