Qytaıda taǵy da jumyssyzdyq deńgeıi ósti
ASTANA. KAZINFORM – Resmı derekke sáıkes, 2024 jyldyń aqpan aıynda Qytaıda jastar arasyndaǵy jumyssyzdyq deńgeıi 16,9%-ǵa jetken.
Qytaıdyń Ulttyq statıstıka bıýrosy búgin jarııalaǵan málimetterge sáıkes, qańtar, aqpan aılarynda Qytaıdaǵy jumyssyzdyq deńgeıi 16-24 jas aralyǵyndaǵy (mektep oqýshylary men stýdentter qamtylmaıdy) jumys kúshi arasynda 16,1%-dan 16,9%-ǵa; 25-29 jas aralyǵyndaǵy (stýdentter qamtylmaıdy) jumys kúshi arasynda 6,9%-dan 7,3%-ǵa; 30-59 jas aralyǵyndaǵy jumys kúshi arasynda 4%-dan 4,3%-ǵa kóterilgen.
Sonymen qatar aqpan aıynda qalalyq jerlerde anyqtalǵan jumyssyzdyq deńgeıi 5,4%-ǵa jetip, sońǵy eki jyldaǵy eń joǵary kórsetkishti kórsetti.
2023 jyldyń maýsym aıynda Qytaıda 16-24 jas aralyǵyndaǵy jumys kúshi arasynda jumyssyzdyq deńgeıi 21,3%-ǵa deıin kóterilgen bolatyn. Іzinshe Qytaı bıligi «jumyssyzdyq týraly statıstıkasyn jetildirý qajettiligine» baılanysty jas toptary boıynsha jumyssyzdyq kórsetkishterin jarııalaýdy ýaqytsha toqtatqan edi.
Tıisti derekter tek 2024 jyldyń qańtarynan keıin qaıta jańartyla bastady, alaıda mektep oqýshylary men stýdentter 16-24 jáne 25-29 jas aralyǵyndaǵy jumys kúshiniń quramyna qamtylmaıtyn boldy.
Eske sala keteıik, buǵan deıin Qytaıda sheteldik ınvestıtsııanyń naqty kólemi ótken eki aıda 20%-ǵa azaıǵanyn jazǵan edik.