Qytaıda «jumysqa barǵysy kelmeıtinderdi emdeıtin klınıka» ashyldy

ASTANA. KAZINFORM — «Jumysqa barǵysy kelmeıtinderdi emdeıtin klınıka» qyzmetkerleri klıentterge jumysqa baılanysty mazasyzdyq, depressııa jáne sharshaý sııaqty máselelermen kúresýge kómektesedi, dep habarlaıdy Kazinform tilshisi South China Morning Post (SCMP) basylymyna silteme jasap.

— Bul syrtqy belgiler kóbinese kúrdeli psıhologııalyq nemese áleýmettik faktorlardan týyndaıdy. Bizdiń mindetimiz — maman retinde osy sebepterdi anyqtap, júıeli túrde baǵalap, dıagnoz qoıyp, emdeý men qoldaý kórsetý, — dedi klınıka basshysy ıÝe Lımın.

Dıagnostıka úderisine patsıentterdiń jalpy emotsıonaldyq jaǵdaıyn baǵalaý úshin suhbat ótkizý jáne gıpertıreoz sekildi organıkalyq aýrýlardy joqqa shyǵarý úshin tekserý kiredi. Sodan keıin dárigerler ár naýqasqa jeke emdeý josparyn ázirleıdi.

Bul qyzmetti qurý ıdeıasyn buryn balalary «mektepke barǵysy kelmeıtin» balalarǵa arnalǵan klınıkaǵa barǵan ata-analar usynǵan.

Áleýmettik jeli qoldanýshylary bul bastamany ázil retinde qabyldady. 

«Bul klınıkany oılap tapqan adam — naǵyz danyshpan!» — dep jazdy bir qoldanýshy.

«Klınıkaǵa kiresiń de, eshqandaı dáriger kórmeısiń, sebebi olar da jumysqa kelgisi kelmeıdi», — dep qaljyńdady taǵy biri.

Buǵan deıin Qytaıda Altsgeımer aýrýyn emdeýge arnalǵan eksperımenttik hırýrgııaǵa tyıym salynǵany habarlanǵan edi.

Eske sala keteıik, buǵan deıin Qytaıda 247 bala qorǵasynnan ýlanǵan balabaqsha qyzmetkerleri qamaýǵa alynǵanyn jazǵan edik.