Qytaıda júk kemesi órtenip, 25 adam qaza tapty
ASTANA. KAZINFORM –10 qyrkúıek kúni saǵat 11:15 shamasynda Qytaıdyń Shandýn provıntsııasynyń Tsındao qalasyndaǵy Beıhaı keme jasaý kompanııasynda jóndeýden ótip jatqan sheteldik júk kemesinen órt shyǵyp, 25 adam qaza boldy, bul týraly Lianhe Zaobao habarlady.
Tótenshe jaǵdaı qyzmetiniń jedel kómegi nátıjesinde órt shamamen saǵat 14:30-da sóndirildi.
Aqparatqa sáıkes, órt shyqqan kezde kemede 42 adam bolǵan. Olardyń 12-si aman-esen sytylyp shyqqan, beseýi denesin kúıik shalyp, aýrýhanaǵa jetkizilgen. Saǵat 20:00-degi málimet boıynsha, kemeden 25 adamnyń denesi tabylǵan.
QHR Tóraǵasy Sı Tszınpın izdestirý-qutqarý jumystaryn shuǵyl júrgizip, apat saldaryn joıý, zardap shekkenderge qajetti kómek kórsetý jumystaryn tıisti deńgeıde uıymdastyrý, sondaı-aq apattyń sebepterin múmkindiginshe jedel anyqtaý jóninde tapsyrma berdi.
Oqıǵa ornynan túsirilgen fotosýretterden «Ocean Melody» atty osy iri kemeniń zaýyt aýmaǵynda turǵanyn kórýge bolady.
Keme qozǵalysyn baqylaýǵa arnalǵan MarineTraffic saıtynyń málimetinshe, «Ocean Melody» — uzyndyǵy 190 metr, Lıberııa týy ilingen júk kemesi.
Basylymnyń jazýynsha, LSEG derekterine sáıkes, keme 31 tamyzda Beıhaı zaýytyna tumsyq tiregen.
Aıta keteıik, Qytaı 2030 jylǵa deıin Jer men Aı arasynda halyqaralyq spýtnıktik jeli qurýdy kózdeıtin Cislunar CubeSat Constellation ǵylymı baǵdarlamasyn iske qosty.
