Qytaıda jolaýshylar sany 3,5 mlrd-tan asty - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstannyń altyn-valıýta rezervteri jańa rekord tirkedi – ÓzA
Ózbekstannyń altyn-valıýta rezervteri 2026 jyldyń aqpan aıyna qaraı alǵash ret 75 mıllıard dollardan asty.
Ózbekstan Respýblıkasynyń Ortalyq banki málimetine sáıkes, 2026 jyldyń qańtar aıynyń qorytyndysy boıynsha eldiń halyqaralyq rezervteri 75,08 mlrd dollardy quraǵan, dep habarlaıdy «ÓzA» aqparat agenttigi.
Habarlamada aıtylǵandaı, bir aı ishinde rezervter kólemi 8,8 mlrd dollarǵa ósken. Osylaısha, altyn-valıýta rezervteri qatarynan altynshy aı tarıhı eń joǵary kórsetkishin jańartty. Sońǵy bir jyl ishinde halyqaralyq rezervter kólemi 82 paıyzdan astamǵa kóbeıgen.
Qańtar aıynda rezervter quramyndaǵy altynnyń quny shamamen 10 mlrd dollarǵa ósip, 65 mlrd dollarǵa jýyqtaǵan. Al altynnyń fızıkalyq kólemi 12,8 mıllıon troıa ýntsııasyn qurady. Sonymen qatar, valıýta rezervteri 1,2 mlrd dollarǵa qysqaryp, 9,5 mlrd dollarǵa deıin tómendegen.
Sondaı-aq osy aptada «ÓzA»-da «Ortalyq Azııa men Germanııa yntymaqtastyǵy damıdy» degen taqyryptaǵy aqparat jarııalandy.
Keltirilgen derekterge súıensek, Berlın qalasynda Frank-Valter Shtaınmaıer jáne Ortalyq Azııa elderiniń syrtqy ister mınıstrleri arasynda kezdesý ótti.
Taraptar ózara baılanystardyń qarqyndy ósip kele jatqanyn atap ótip, «Ortalyq Azııa – Germanııa» formatyndaǵy seriktestikti odan ári damytýǵa daıyn ekendikterin rastady.
Saýda-ekonomıkalyq jáne ınvestıtsııalyq yntymaqtastyq aýqymyn keńeıtýge, kólik jáne tranzıt tizbegin nyǵaıtýǵa, sondaı-aq birlesken energetıkalyq jobalardy júzege asyrýǵa erekshe nazar aýdaryldy.
Qatysýshylar turaqty damýdy qamtamasyz etý, klımattyń ózgerýine qarsy kúres júrgizý, sonyń ishinde aımaqtaǵy muzdyqtardyń erýi máselesin sheshý baǵytyndaǵy kúsh-jigerdi úılestirýdiń mańyzdylyǵyn biraýyzdan qoldady.
Óz kezeginde prezıdent Shtaınmaıer Germanııa Federatıvtik Respýblıkasynyń Ortalyq Azııa elderimen kópqyrly yntymaqtastyqty odan ári nyǵaıtýǵa múddeli ekenin jetkizdi.
Jambyl oblysynan Qytaıdyń kóne dáýirlerine tıesili teńgeler tabyldy - Jenmın jıbao
Qazaqstan arheologtary elimizdiń ońtústigindegi Jambyl oblysy aýmaǵynan VIII–XII ǵasyrlarǵa jatatyn kóne teńgelerdiń bir tobyn anyqtady. Bul týraly Jenmın jıbao tilshisi Lı Chıan 11 aqpanda Astana qalasynan habarlady.
Qytaılyq BAQ-tyń málimetinshe, tabylǵan jádigerlerdiń basym bóligi VIII–XII ǵasyrlar aralyǵynda soǵylǵan. Olardyń qatarynda Qytaıdyń Tań jáne Sýn áýletteri kezeńindegi mys teńgeler bar.
Mamandar bul oljany Uly Jibek joly boıyndaǵy saýda-ekonomıkalyq baılanystardyń qarqyndy damyǵanynyń naqty aıǵaǵy retinde baǵalap otyr. Arheologtardyń aıtýynsha, tabylǵan teńgelerdiń tarıhı ári ǵylymı qundylyǵy joǵary, olar ejelgi saýda qatynastary men aımaqaralyq ekonomıkalyq baılanystardy zertteýge mańyzdy derekkóz bolmaq.
Qazirgi ýaqytta tabylǵan zattarǵa keshendi arheologııalyq jáne ǵylymı zertteý jumystary júrgizilýde. Zertteý aıaqtalǵannan keıin kóne teńgeler óńirlik mýzeı qoryna turaqty saqtaýǵa berilmek.
Tutas qoǵamda óńir attaǵan jolaýshy sany 3,5 mlrd-tan asty – CNR
Qytaıdaǵy kóktem merekesine baılanysty uıymdastyrylǵan tasymal kezeńinde jolaýshylar aǵyny aıtarlyqtaı ósip, jalpy sapar sany birneshe mıllıardtyq mejeden asty, dep habarlaıdy Qytaıdyń «Ortalyq halyq radıosy».
Atalǵan BAQ-tyń dereginshe, kóktem merekesine oraı bastalǵan tasymal naýqany aıasynda 16 aqpanǵa deıin tutas qoǵam boıynsha óńir attaǵan jolaýshylar sany 3 mıllıard 500 mıllonnan asty.
Resmı málimetke sáıkes, saparlaǵandardyń táýliktik ortasha kórsetkishi 230 mln adamdy qurady. Bul – 2025 jyldyń sáıkes kezeńimen salystyrǵanda 4%-ǵa joǵary.
Derekkóz málimetinshe, jolaýshylar aǵynynyń artýy merekelik kezeńdegi ishki qozǵalystyń jandanýymen baılanysty.
Jasandy ıntellekt chat-bottary jarnama alańyna aınalýda - TRT
Chat-bottarǵa jarnamalar men demeýshilik kontenttiń qosylýy jasandy ıntellekt paıdalanýshylary úshin qupııalylyqqa qatysty alańdaýshylyq týdyrdy.
«OpenAI» júzdegen mıllıard dollarlyq shyǵyn mindettemelerin jańa tabys kózderimen teńestirýdi bastaý maqsatynda tegin jáne tómen aqyly paıdalanýshylarǵa chat-bottarda jarnama kórsete bastady.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, «OpenAI»-den bólek «Microsoft» 2023 jyldan beri «Copilot» jasandy ıntellekt assıstentinde kontekstke negizdelgen jarnamalar men demeýshilik kontentter jarııalap keledi.
Jasandy ıntellekt izdeý júıesi «Perplexity» 2024 jyldan beri AQSh-ta jarnamalardy synaqtan ótkizip jatsa, «Google» da ótken jyldan beri AI «qysqasha mazmundamalarynda» jarnamalardy synaq retinde qoldanýda.
Túrkııalyq basylym bul jazbasynda «Jeke derek qupııalylyǵy» degen taqyrypqa toqtalǵan.
Atap aıtqanda «Google» «Gemini» chat-botynda jarnama jarııalaǵysy keledi degen aıyptardy birneshe ret joqqa shyǵardy. «DeepMind» jasandy ıntellekt bóliminiń basshysy Demıs Hassabıs jarnamalardyń «óte muqııat qarastyrylýy kerektigin» aıtyp, JI-degi «eń mańyzdy nárse» «qaýipsizdik pen qupııalylyqqa degen senim» ekenin bildirdi.
Sondaı-aq osy aptada TRT basylymynda «Jasandy ıntellektti qoldaný etıkasy alańdaýshylyq týdyrýda» degen taqyryptaǵy aqparat jaryq kórdi.
TRT-nyń dereginshe, BUU Bas hatshysy tehnologııanyń qarqyndy damýy jaǵdaıynda teń qoljetimdilikti qamtamasyz etý úshin tehnologııa alpaýyttaryn 3 mıllıard dollarlyq jahandyq qordy qoldaýǵa shaqyrdy.
BUU Bas hatshysy Antonıý Gýterrısh jasandy ıntellekttiń qaýip-qaterlerine nazar aýdara otyryp, onyń bolashaǵyn «birneshe mıllıarderdiń qalaýyna» qaldyrýǵa bolmaıtynyn málimdedi.
Beısenbi kúni Úndistanda ótken jahandyq jasandy ıntellekt sammıtinde Gýterrısh tehnologııa kóshbasshylaryn tez damyp kele jatqan bul tehnologııaǵa barshaǵa teń qoljetimdilikti qamtamasyz etetin 3 mıllıard dollarlyq jahandyq qordy qoldaýǵa shaqyrdy.
Altaı qalasynda qoǵamdyq avtobýstar 9 kún tegin júredi – Altaı aqparaty
Qytaıdyń ulttyq kóktem merekesine oraı Altaı qalasy turǵyndary men qonaqtaryna qolaıly jaǵdaı jasaý maqsatynda qoǵamdyq kólikterde 9 kún boıy tegin júrý sharasy uıymdastyryldy, dep habarlaıdy qytaılyq «Altaı aqparaty» basylymy.
atalǵan BAQ-tyń dereginshe, 2026 jyldyń 15–23 aqpany aralyǵynda qaladaǵy 7 avtobýs jelisinde jol júrý aqysy alynbaıdy. Atap aıtqanda, №1, №2, №5, №101 baǵyttar, sondaı-aq temirjol vokzaly, áýejaı jáne shańǵy bazasyna qatynaıtyn arnaıy jeliler tegin qyzmet kórsetedi.
Negizgi qalalyq baǵyttar kún saıyn 09:20-dan 20:20-ǵa deıin júredi. Áýejaı baǵyty ushaqtardyń kelý ýaqytyna qaraı uıymdastyrylsa, temirjol vokzalyna qatynaıtyn avtobýstar belgilengen keste boıynsha júredi. Al shańǵy bazasy baǵyty 09:50-den 23:20-ǵa deıin qyzmet etedi.
Qalalyq kólik qyzmeti turǵyndardy qoǵamdyq tártipti saqtap, aıaldamalar men avtobýs ishiniń tazalyǵyn qorǵaýǵa shaqyrdy.
Sondaı-aq osy aptada «Altaı aqparaty» basylymynda «Jemeneı shekara ótkelindegi jolaýshylar sany 113,2%-ǵa ósti» degen taqyryptaǵy aqparat jaryq kórgen bolatyn.
Bıyl qańtar aıynda Jemeneı shekara ótkeli arqyly ótken jolaýshylar sany ótken jyldyń sáıkes kezeńimen salystyrǵanda 113,2%-ǵa artty.
Shekara qyzmetiniń málimetinshe, 31 qańtarǵa deıin ótkelden 11 myńnan astam adam ótken. Táýliktik eń joǵary kórsetkish 890 adamdy qurady. Sonymen qatar 1 500-den astam kólik tekserilip, bul kórsetkish 28,3%-ǵa kóbeıgen.
Qańtarda ótkelden ótkenderdiń jartysynan astamy týrıster. Bir kúndik saparlar, ásirese Zaısan aýdany men Shyǵys Qazaqstan oblysy baǵyttary suranysqa ıe bolǵan.
Mamandar jolaýshylar aǵynynyń ósýin ótkizý rásimderiniń ońtaılandyrylýymen baılanystyrady. Qyzmetkerler aldyn ala tekserý jáne aqparattandyrý júıesin engizý arqyly ótkizý ýaqytyn qysqartqan.
Jaýapty vedomstvo ókilderi bul sharalar Qazaqstan men Qytaı arasyndaǵy ekonomıkalyq jáne gýmanıtarlyq baılanystardy damytýǵa yqpal etetinin atap ótti.