Qytaıda jol talǵamaıtyn kólik bir top oqýshyny basyp ketti

ASTANA. KAZINFORM — Qytaıdyń ortalyǵyndaǵy Hýnan provıntsııasynyń Chande qalasyndaǵy bastaýysh mekteptiń aldynda bir top adamǵa shabýyl jasaldy. Belgisiz er adam kólikpen mektepke kirip, kóptegen oqýshylardy qaǵyp ketti.

Sınhýa aqparat agenttiginiń habarlaýynsha,  shabýyl jergilikti ýaqyt boıynsha 19 qarasha kúni tańǵy saǵat 8-de bolǵan.

Oqıǵa búgin jergilikti ýaqytpen tańerteń oqýshylar mektepke kirgen kezde jasalǵan. Belgisiz er jol talǵamaıtyn kólikpen mekteptiń aldynda jınalyp turǵan oqýshylardy qaqqan.

Ǵalamtorda jarııalanǵan keıbir beınejazbalarda qorqyp qalǵan kóptegen balalardyń mektepke qaraı júgirgeni, keıbiriniń jerge qulap túskeni, al basqalarynyń kómek surap úreılenip jatqany kórsetilgen.

Qazirgi ýaqytta shabýyl jasaǵan adam ustalyp, polıtsııa qamaýǵa alynyp, jaralanǵandar aýrýhanaǵa jetkizildi. Oqıǵadan zardap shekkender týraly aqparat ázirge joq.

Bul Qytaıda sońǵy ýaqytta bolǵan osyndaı 9-oqıǵa. Ótken demalys kúnderi Qytaıdyń Chjýhaı qalasyndaǵy ýnıversıtet qalashyǵynda pyshaqpen shabýyl jasalyp, onyń saldarynan 8 adam qaza taýyp, 17 adam jaralanǵanyn habarlaǵan bolatynbyz.