Qytaıda jol qozǵalysyn retteıtin robottar paıda boldy
ASTANA. KAZINFORM – Mamyr aıynyń basynan bastap Shyǵys Qytaıdaǵy Chjetszıan provıntsııasyna qarasty Hanchjoý qalasynda jol qozǵalysyn basqarýǵa arnalǵan ıntellektýaldy robottar jumys isteı bastady, dep habarlaıdy Sınhýa agenttigi.
Negizgi qıylystar men ortalyq kóshelerde ıntellektýaldy basqarý júıesimen jabdyqtalǵan 15 robot-retteýshi qyzmet atqaryp júr. Olar týrısterge baǵyt-baǵdar beredi, jol qozǵalysy erejeleriniń saqtalýyn baqylaıdy jáne kólik aǵyndaryn retteýge qatysady.
Qytaı robot tehnıkasyn belsendi túrde damytyp, ıntellektýaldy robottardy kólik júıesine, ónerkásipke, qyzmet kórsetý salasyna jáne qalalyq ınfraqurylymǵa engizip jatyr. El avtomattandyrý men jasandy ıntellekt tehnologııalaryna basymdyq berip, robot tehnıkasyn ekonomıkalyq jáne tehnologııalyq damýdyń negizgi baǵyttarynyń biri retinde qarastyrady.
Buǵan deıin Qytaıda qaýip deńgeıi óte joǵary aımaqtarda jumys isteýge arnalǵan embodied intelligence tehnologııasymen jabdyqtalǵan arnaıy robottardyń jańa klasy paıdalanýǵa berilgen edi.
Qytaılyq robot tehnıkasyn ázirleýshiler sondaı-aq adamǵa uqsas mashınalardy tájirıbede qoldanýǵa basymdyq berip otyr. Olar nazardy kórneki demonstratsııalardan turmystyq mindetterdi oryndaýǵa qaraı aýystyryp jatyr. Robottardyń tehnıkalyq bazasy aıtarlyqtaı damyǵanymen, olardyń «ıntellekti» áli de jetkiliksiz deńgeıde qalyp otyr. Bólmeni jınaý, ydys jýatyn mashınany toltyrý nemese kıim búkteý sekildi adam úshin qarapaıym sanalatyn mindetterdiń ózi robottar úshin áli de kúrdeli synaq bolyp sanalady.
Aıta keteıik, Japonııada tolyǵymen robottar basqaratyn medıtsınalyq zerthana iske qosyldy.
Al robototehnıkadan ótken álem chempıonatynda Qazaqstan quramasy 12 marapatqa ıe boldy.
