Qytaıda joǵary laýazymdy áskerıler arasyndaǵy sybaılas jemqorlyq tergelip jatyr

ASTANA. KAZINFORM – QHR bıligi eki joǵary laýazymdy áskerı basshyǵa qatysty tergeý amaldaryn bastady, dep habarlaıdy QHR Qorǵanys mınıstrligi.

Kúdiktiler – QKP Ortalyq Komıteti Saıası bıýrosynyń múshesi jáne Ortalyq áskerı keńes (OÁK) tóraǵasynyń orynbasary Chjan ıÝsıa jáne OÁK Birikken shtabynyń bastyǵy Lıý Chjenlı.

Tergeýdiń resmı sebebi retinde «partııalyq tártip pen zańdy aýyr jaǵdaıda buzǵany» ataldy. Qytaıdyń saıası tájirıbesinde bul termın dástúrli túrde sybaılas jemqorlyqqa kúdik týdyrady. Tergeýdi bastaý týraly sheshimdi tikeleı Qytaı Kompartııasynyń Ortalyq komıteti qabyldady.

Qytaıdyń Halyq-azattyq armııasynyń basylymy «Tszefantszıýn bao» Beıjińniń «qarýly kúshterdegi sybaılas jemqorlyqqa qarsy soǵysty» aıaqtaýǵa bel baılaǵanyn rastaıtyn redaktsııalyq maqala jarııalady.

Basylymda is boıynsha aıyptalýshylardyń áreketteri OÁK tóraǵasynyń jaýapkershilik júıesin buzǵany, armııa basshylyǵynyń ıdeologııalyq jáne saıası birligi men bedeline nuqsan keltirgeni jáne áskerlerdiń jaýyngerlik daıarlyǵy men «saıası ekologııasyna» keri áser etkeni atap ótilgen.

Buǵan deıin Qytaıda iri kompanııanyń burynǵy basshysy ólim jazasyna kesilgenin jazǵan bolatynbyz.