Qytaıda JI mamandaryna suranys 50%-ǵa artty
ASTANA. KAZINFORM — Qytaıda jasandy ıntellekt boıynsha mamandandyrylǵan ýnıversıtet túlekterine suranys bıylǵy jyldyń alǵashqy bes aıynda 47,3%-ǵa ósti, dep habarlaıdy China Daily.
Maimai platformasynyń esebine sáıkes, jumys jármeńkelerindegi suranysqa baılanysty túlekter úshin JI-ge qatysty qyzmet úlesi jyl ishinde 26,41%-dan 37,56%-ǵa deıin ósti. Qazir jas mamandarǵa usynylatyn on jumys ornynyń tórteýi JI daǵdylaryn talap etedi.
Tehnologııalyq alyp Alibaba kompanııasynyń HR ókili aǵymdaǵy maýsymnyń negizgi úrdisi JI mamandaryna suranystyń kúrt ósýi ekenin atap ótti.
— Túlekterge arnalǵan bos oryndardyń 80%-dan astamy qazir JI-ge qatysty. Buǵan iri kólemdi tildik modelder, mýltımodaldy JI, JI ınfraqurylymy sııaqty ozyq salalar kiredi, — dep túsindirdi HR mamany.
Maimai esebinde jumys berýshiler negizinen magıstr dárejesi bar mamandardy izdeıtini kórsetilgen. Jasandy ıntellekt agentterin ázirleý, mashınalyq oqytý jáne mýltımodaldy jasandy ıntellekt te eń suranysqa ıe quzyrettilikterdiń qataryna kirdi.
Zhaopin.com platformasynyń derekteri jasandy ıntellekt mamandaryna degen suranystyń tsıfrlyq ekonomıkadan áldeqaıda asyp túskenin kórsetedi. Jyldyń alǵashqy bes aıynda jas jasandy ıntellekt ınjenerleri úshin bos oryndardyń besten biri (21%) joǵary tehnologııalyq jabdyqtar men aqyldy óndiris salasynda boldy.
— Jasandy ıntellekt endi baǵdarlamalyq jasaqtama nemese mıkrochıpterdi ázirleýmen shektelmeıdi. Tehnologııa ónerkásipte keńinen engizilip, búkil óndiris tizbeginiń negizine aınalyp keledi, — dep atap ótti platforma ókili.
Buǵan deıin Qytaıdyń joǵary oqý oryndarynda JI suranys óte joǵary mamandyqtardyń birine aınalǵanyn habarlaǵan edik.
