Qytaıda jyljymaıtyn múlik naryǵyndaǵy daǵdarys kúsheıdi
ASTANA. QazAqparat – Qytaıdyń jyljymaıtyn múlik naryǵyndaǵy qıyndyqtar Azııa bankterine jańa qysym túsire bastady. Kepilge qoıylǵan nysandardyń qunsyzdanýyna baılanysty 10 mlrd AQSh dollarynan astam transshekaralyq nesıelerdiń qaıtarylmaı qalý qaýpi artyp otyr.
Sońǵy aqparatqa sáıkes, Gonkongtaǵy Parkview Group 940 mln dollar kólemindegi nesıeniń merzimin uzartýǵa tyrysyp jatyr. Alaıda kompanııanyń negizgi kredıtorlary sanalatyn Taıvan bankteri ázirge kelisim bermegen. Naryqtaǵy aıqynsyzdyq pen jyljymaıtyn múlik qunynyń tómendeýi mundaı nesıeler úshin táýekeldi kúsheıtip otyr.
Osyǵan uqsas jaǵdaıdy Gaw Capital basqaratyn qor da bastan ótkerip jatyr. Qor 260 mln dollarlyq qaryzdy óteý merzimin ótkizip aldy. Eger kredıtorlar jaqyn kúnderi talap qoıǵan jaǵdaıda, bul qaryz resmı túrde defolt dep tanylýy múmkin. Nesıe bergen bankter qatarynda HSBC, Hang Seng Bank, UOB jáne birneshe iri taıvandyq qarjy ınstıtýttary bar. Olar nesıeni sheksiz merzimge uzartýǵa qulyqsyz bolǵanymen, defolt oryn alsa, kepil múlkiniń baǵasynyń tómendeýi saldarynan ózderi de aıtarlyqtaı shyǵynǵa ushyraýy yqtımal.
Parkview Group ózine tıesili eń iri aktıv – Beıjińdegi Parkview Green keshenin satý múmkin bolmaı otyr. Al Gaw Capital Shanhaıdaǵy Ocean Towers keńse ǵımaratyn satyp, qaryzyn jabý josparyn da júzege asyra almady. Bul nysandar naryq quldyraǵan kezeńde ótimdiligin joǵaltyp, ınvestorlar tarapynan qyzyǵýshylyq kúrt tómendegenin kórsetedi.
Eki nesıe de Qytaıdaǵy burynǵy jyljymaıtyn múlik órleýi kezinde berilgen transshekaralyq qarjylandyrý jobalarynyń bir bóligi bolǵan. Alaıda qazirgi jaǵdaıda dál osyndaı mámileler syrtqy shoktarǵa erekshe sezimtal bolyp otyr.
Gaw Capital sonymen qatar Shanhaıdaǵy taǵy bir jobaǵa qatysty 110 mln dollarlyq nesıeni qaıta qarjylandyrý jóninde banktermen kelissóz júrgizip jatyr.
Qytaıdyń jyljymaıtyn múlik sektorynyń problemasy qarjy naryǵyna áserin kúsheıte tústi. Kepil múlkiniń quny tómendep, syrtqy qarjylandyrý kózderiniń tarylýy kompanııalardyń qaıta qarjylandyrý múmkindigin shektep otyr. Bul úrdis Qytaı ekonomıkalyq ósiminiń baıaýlaýyna jáne ınvestorlar seniminiń álsireýine alyp keledi.
Saraptamalyq baǵalaýlarǵa sáıkes, qazirgi qıyndyqtar jalǵasa berse, aımaqtaǵy bankterdiń táýekel deńgeıi ulǵaıyp, transshekaralyq nesıeleýdiń kólemi qysqarýy múmkin. Sonymen qatar, Qytaıdaǵy jyljymaıtyn múlik naryǵynyń álsizdigi ishki suranysqa da áser etip, ekonomıkanyń qalpyna kelý qarqynyn tejeı túsýi yqtımal.