Qytaıda JI kómegimen túsirilgen alǵashqy tolyqmetrajdy fılm kórermen jınaı almady
ASTANA. KAZINFORM — Qytaıda jasandy ıntellekt kómegimen túsirilgen alǵashqy tolyqmetrajdy fılm prokattyń alǵashqy aptasynda 1,495 mln ıýan (225 myń dollar) tabys tapty. Al ony túsirýge 10 mln ıýannan astam qarjy jumsalǵan, dep habarlaıdy Kazinform agenttiginiń Beıjińdegi menshikti tilshisi jergilikti BAQ-qa silteme jasap.
Bona Film Group kompanııasy túsirgen «Sansındýı: Ótkennen keleshekke» ǵylymı-fantastıkalyq fılmi 23 qazanda prokatqa shyqty. Kartına kınoteatrlarǵa arnalǵan alǵashqy gıperrealıstik jasandy ıntellekt jobasy retinde tanystyryldy.
100 mınýtqa sozylatyn fılmde ejelgi Qytaıdyń Sansındýı órkenıeti men bolashaq áleminiń tynys-tirshiligi ózara sabaqtasady. Sıýjet kóne tańbalardyń qupııasyn ashyp, asa damyǵan jasandy ıntellekttiń ústemdigine túsken bolashaq adamzatty qutqarýǵa umtylǵan arheologtyń tóńireginde órbıdi.
Kórermender men sala mamandarynyń baǵalaýynsha, fılmniń kórkemdik sapasy kınoteatrlarda kórsetiletin týyndylar deńgeıinen tómen. Olar týyndynyń sapasyn jasandy ıntellekt kómegimen túsirilgen alǵashqy qysqametrajdy fılmdermen salystyrady.
— Avtorlardyń qolynda tolyqqandy stsenarıı emes, birneshe tujyrymdamalyq eskız ǵana bolǵan sııaqty. Olar bastapqy úlgiler negizinde kórinisterdi jaı ǵana jasandy ıntellekt arqyly qurastyrǵandaı áser qaldyrady. Kadrlar men sahnalardyń ózara úılespeýi de osydan týyndaǵan, al dybystyq bezendirýdiń sapasy kóńil kónshitpeıdi. Eger fılm kórermenge aqyly túrde usynylsa, mundaı kemshilikterdi jasandy ıntellekt kómegimen jasalǵanymen aqtaýǵa bolmaıdy, — dedi kınematografıst Gýan ıAdı.
Gýannyń aıtýynsha, jasandy ıntellekt kómegimen kıno túsirýdegi basty tehnologııalyq kedergi — óndiris protsesiniń uzaqqa sozylýy. Fılmdi ázirleýge birneshe jyl ketken. Al generatıvti modelder apta saıyn jańaryp otyrady. Sonyń nátıjesinde týyndy jaryqqa shyqqansha ony jasaýǵa paıdalanylǵan quraldar eskirip úlgergen.
Buǵan deıin Qytaıda jańa mıkroserıaldardyń 90%-dan astamy JI kómegimen jasalatynyn habarlaǵanbyz.
