Qytaıda jerleý qyzmetterine arnalǵan resmı veb-portal iske qosyldy
ASTANA. KAZINFORM — Bıyl 5 sáýirde, Tsınmın merekesi (marqumdardy eske alý kúni) qarsańynda, Qytaı Halyq Respýblıkasynyń Azamattyq ister mınıstrliginiń basshylyǵymen ázirlengen jerleý qyzmetterine arnalǵan ulttyq veb-portal resmı túrde iske qosylǵany belgili boldy, dep habarlaıdy Sınhýa.
Saıt jerleý rásimderin uıymdastyrýǵa qatysty halyqtyń aqparattyq qajettilikterine baǵyttalǵan.
Ol el boıynsha jerleý qyzmetteriniń aqparattyq resýrstaryn biriktirip, janaza, máıitti jerleý jáne eske alý sharalaryna qatysty suraqtar boıynsha senimdi aqparat pen keńes alýǵa múmkindik beredi.
Mınıstrlik ókili Sıýı Tszeshenniń aıtýynsha, veb-portaldy ázirleý men ilgeriletýge eldegi barlyq azamattyq ákimshilik organdar qatysqan.
Onyń sózinshe, jańa platforma jerleý rásimderin uıymdastyratyn azamattarǵa túrli óńirlerdegi qyzmetterdi jyldam tabýǵa jáne olardyń baǵasyn naqty salystyrýǵa kómektesedi.
Vedomstvo málimetinshe, kelesi kezeńde saıttyń múmkindikteri keńeıtilip, ekologııalyq jerleý tásilderin damytýǵa jáne Qytaıdaǵy marqumdardy eske alýdyń órkenıetti dástúrlerin nasıhattaýǵa baǵyttalady.
Qytaı jyldar boıy jer resýrstaryn únemdeý jáne qorshaǵan ortany qorǵaý maqsatynda ekojerleýdi belsendi damytyp keledi. 30 naýryzda jerleý qyzmetterine qatysty jaqynda qaıta qaralǵan erejeler kúshine endi, onda «ekologııalyq jerleý tásilderi» termıni engizildi.
Normatıvtik aktiler teńizge, aǵashqa, gúlder arasyndaǵy nemese shalǵynǵa jerleýdi tikeleı qoldaıdy. Qazirgi tańda Qytaıdyń 28 ákimshilik birligi ekologııalyq jáne jerdi únemdeıtin jerleý tásilderin qoldaıtyn nusqaýlyqtar jarııalaǵan, olar sýbsıdııalar men yntalandyrý sharalarymen bekitilgen.
Mysaly, Sıan qalasynda ekojerleý úlesi qazirgi tańda barlyq jerleýdiń 34,4%-yn quraıdy. Qala 2021 jyldan beri qoǵamdyq paıdaly is-shara aıasynda jerleýdi sýbsıdııalaý baǵdarlamalaryn iske qosyp, ekologııalyq jáne yqsham jerleý nusqalaryn yntalandyrý sharalaryn engizdi.
2023 jyldan bastap, «Sıan Fenchjenıýan» jerleý bıýrosynda eki ekojerleý rásiminen bólek, qalanyń azamattyq basqarmasy úsh jyl qatarynan jaǵalaýdaǵy Tsındao qalasynda qaıyrymdylyq teńiz jerleýlerin uıymdastyrdy. Osy bastamalar nátıjesinde 480-dan astam adamnyń kúlin tabıǵatqa jerleý arqyly sońǵy mekenine jetkizdi.
Sıan – teńizge jerleýdi qoldaıtyn jalǵyz qala emes. Qytaıdyń barlyq jaǵalaýlyq qalalarynda otbastar marqum týystarymen sońǵy qoshtasý retinde osy tásildi tańdaıdy.
Budan buryn Qytaıda jasandy ıntellektini etıkalyq retteýdiń jańa erejeleri bekitilgenin jazǵanbyz.
