Qytaıda jerleý qyzmetin retteý erejesine ózgerister engizildi
ASTANA.KAZINFORM — Qytaı úkimeti salany búkil tizbek boıynsha tıimdi retteý, sondaı-aq halyqqa qoljetimdi ári ekologııalyq taza qyzmet túrlerin usyný maqsatynda Jerleý isin retteý týraly erejege túzetýler qabyldady, dep jazady Sınhýa.
Qujatty jarııalaý týraly jarlyqqa QHR Memlekettik keńesiniń premeri Lı Tsıan qol qoıdy. Jańartylǵan ereje 30 naýryzdan bastap kúshine enedi.
8 bólim men 73 baptan turatyn qujatta jerleý jáne máıitti jerleý qyzmetteriniń áleýmettik mańyzy atap kórsetilip, qoǵamdyq paıda, únemdilik, órkenıettilik jáne ekologııalyq tazalyq qaǵıdattary bekitilgen.
Ereje jerleý qyzmetterin ońtaılandyrýdy, jerleý dástúrlerin reformalaýdy, sondaı-aq jer resýrsyn únemdeıtin jáne ekologııalyq qaýipsiz jerleý túrlerin keńinen engizýdi kózdeıdi.
Qujatta jerleýdi uıymdastyrýǵa qatysty negizgi qoǵamdyq qyzmetterdiń tizbesi naqtylanyp, olardy ulttyq bazalyq qoǵamdyq qyzmetter júıesine kezeń-kezeńimen engizý qarastyrylǵan. Sonymen qatar halyqtyń suranysyna saı qarjylandyrý tetigi belgilenedi.
Artyq tólemderdiń aldyn alý úshin qyzmetterge baǵa preıskýranty engiziledi jáne bekitilgen tizimge kirmeıtin qyzmetter úshin aqy alýǵa tyıym salynady. Retteýshi organdarǵa baǵaǵa baqylaýdy kúsheıtý mindeti júktelip, baǵaǵa qatysty zańbuzýshylyqtar naqty sıpattalady.
Sondaı-aq qujatta quqyq qorǵaý organdarynyń ózara is-qımylyn kúsheıtý jáne qyzmetterdiń búkil tizbegine — qaıtys bolǵany týraly kýálik berý, jerleý jáne eske alý sharalaryna — jan-jaqty baqylaý ornatý qarastyrylǵan.
Qytaıdyń Ádilet mınıstrligi men Azamattyq ister mınıstrligi birlesken baspasóz habarlamasynda bul túzetýler jerleý salasyndaǵy jańa syn-qaterlerge jaýap berý úshin ázirlengenin málimdedi.
Vedomstvolardyń habarlaýynsha, jańartylǵan ereje memlekettik ınvestıtsııalardy arttyrýdy, ınfraqurylym nysandarynyń sanyn kóbeıtýdi, otbasylardyń qarjylyq júktemesin azaıtýdy, qyzmet kórsetý qolaılylyǵyn jaqsartýdy jáne jerleý men eske alý rásimderinde órkenıetti, tómen kómirtekti ári ekologııalyq tájirıbelerdi keńinen nasıhattaýdy kózdeıdi.
Budan buryn Qytaı kontratseptıvtik quraldarǵa salyq engizgenin jazǵanbyz.