Qytaıda jelden qýat alatyn alǵashqy sýasty derekter ortalyǵy iske qosyldy

ASTANA. KAZINFORM – Qytaıdyń Shanhaı qalasynda teńiz jel elektr stansalarynyń energııasymen jumys isteıtin álemdegi alǵashqy sýasty derekter ortalyǵynyń qurylysy aıaqtalyp, paıdalanýǵa berildi, dep habarlaıdy TV BRICS agenttigi.

Derekkózdiń málimetinshe, bul biregeı joba ekologııalyq taza ári energııasy tıimdi tsıfrlyq ınfraqurylymdy damytý salasynda jańa múmkindikter ashady.

Lıngan ákimshiligi ókilderiniń habarlaýynsha, derekter ortalyǵynyń qýaty 24 megavatty quraıdy. Jobany iske asyrýǵa 1,6 mıllıard ıýan (shamamen 225 mıllıon AQSh dollary) ınvestıtsııa salynǵan.

Jańa tehnologııanyń basty artyqshylyǵy — resýrstardy aıtarlyqtaı únemdeýinde. Tutynylatyn elektr energııasynyń 95 paıyzdan astamy teńiz jelinen alynady. Dástúrli derekter ortalyqtarymen salystyrǵanda, jańa nysan jalpy energııa tutynýdy 22,8 paıyzǵa tómendetedi. Sonymen qatar jobada salqyndatý úshin sý paıdalanylmaıdy jáne qurlyqtaǵy alańdy 90 paıyzdan astam qysqartýǵa múmkindik berilgen.

Mamandardyń aıtýynsha, Shanhaıdaǵy bul joba teńiz jel elektr stansalary sekildi jańartylatyn energııa kózderin paıdalaný arqyly derekterdi óńdeý ortalyqtaryn damytý baǵytyndaǵy mańyzdy qadam bolyp sanalady. Bul bastama esepteý úderisteriniń energııa tıimdiligin arttyryp, ekologııalyq turaqtylyǵyn kúsheıtedi.

Aıta keteıik, Qytaı jeke derekterdi shetelge tasymaldaý úshin jańa sertıfıkattaý erejelerin engizdi.