Qytaıda jasy shamamen 200 mln jyl bolatyn dınozavr izderi tabyldy

ASTANA. KAZINFORM — Paleontologter Qytaıdyń ońtústik-batysyndaǵy Sychýan provıntsııasyndaǵy jartastan dınozavrlar men basqa da omyrtqalylarǵa tıesili 20-dan astam iz tapty, dep habarlaıdy Sınhýa.

Olardyń aıtýynsha, bul jańalyq shamamen 200 mıllıon jyl burynǵy dınozavrlardyń erte evolıýtsııasyn jańa qyrynan tanýǵa múmkindik beredi.

Іzder ótken aıda Dýtszıanıan qalasynyń aýmaǵynda tabıǵatty súıetin bir azamatpen tabylǵan, al olardyń shynaıylyǵyn keıin Qytaı geologııalyq ǵylymdar ýnıversıtetiniń (Beıjiń) dotsenti Sın Lıda jetekshilik etken zertteý toby rastady. Dýtszıanıanda dınozavr izderi alǵash ret anyqtalyp otyr.

Sın Lıda bul izder ártúrli kólemdegi teropodtarǵa — jyrtqysh dınozavrlarǵa, sondaı-aq adam qolynyń izindeı bolyp keletin jáne erte arhozavr reptılıılerine jatqyzylǵan izderge tıesili ekenin aıtty.

— Bul jańalyqtyń erekshe qundy tusy — izder kem degende tórt qabatta saqtalǵan. Osyǵan baılanysty dınozavrlar bul jerde uzaq ýaqyt ómir súrgen dep boljaýǵa bolady, — dedi Sın Lıda.

Zertteýshiler bul izderdiń janynan qulaǵan bóreneler men tiginen turǵan shirigen túbirlerdi qosa alǵanda, qazbaǵa aınalǵan aǵashtardyń bólikterin de tapqan. Olar 200 mıllıon jyldan astam ýaqyt burynǵy jergilikti ekojúıe týraly jańa málimetter beredi.

Sychýan provıntsııasyndaǵy Tszygýn qalalyq dınozavrlar mýzeıiniń zertteýshisi Tszıan Shan tabylǵan izder Qytaıdaǵy dınozavrlardyń erte evolıýtsııalyq tarıhyn ǵalymdardyń jaqsyraq túsinýine kómektesýi múmkin ekenin aıtty.

Budan buryn reseılik paleontologter Tájikstannan úırek tumsyqty dınozavrdyń bas súıeginiń synyǵyn tapqanyn jazǵanbyz.