Qytaıda jasandy ıntellektpen aınalysatyn 5 300-den astam kompanııa bar

ASTANA. KAZINFORM — 2024 jylǵy qyrkúıek aıyndaǵy jaǵdaı boıynsha Qytaıda jasandy ıntellekt (JI) salasynda jumys isteıtin 5 300-den astam kompanııa tirkelgen, dep habarlaıdy Sınhýa.

Bul álemdik kórsetkishtiń 15 paıyzyna teń, dep habarlady Qytaıdyń Aqparattyq jáne kommýnıkatsııalyq tehnologııalar akademııasy (CAICT).

Statıstıkalyq málimetterge sáıkes, 2024 jyldyń qorytyndysy boıynsha Qytaıdaǵy JI ındýstrııasynyń aýqymy 900 mıllıard ıýannan (shamamen 126,7 mıllıard AQSh dollary) asty. Bul ótken jylmen salystyrǵanda 24 paıyzǵa artyq.

Elde JI sektory boıynsha bazalyq ınfraqurylymnan bastap, modelder arhıtektýrasy men salalyq qoldanbalarǵa deıingi tolyq óndiristik tizbek qurylǵan.

Akademııanyń málimetinshe, bul salalar boıynsha tabys ótken jyly sáıkesinshe 54%, 18% jáne 13% ósim kórsetken.

Akademııa ókilderiniń aıtýynsha, JI negizindegi smartfondar men kompıýterler, sondaı-aq ıntellektýaldy kólik quraldary sekildi aqyldy qurylǵylardyń naryǵy qarqyndy damyp keledi.

Qytaı tsıfrlyq ekonomıkany «aqyldy» ekonomıkaǵa jáne ıntellektýaldy qoǵamǵa aınaldyrý úshin júıeli túrde jumys júrgizip jatyr. Bıylǵy jyly elde JI-di qoldaıtyn ınfraqurylymdy kúsheıtip, jasandy ıntellekt tehnologııalaryn áleýmettik-ekonomıkalyq salalarǵa jedel engizýdi kózdeıtin «JI plıýs» bastamasyn tereńdetý jónindegi usynystar jarııalanǵan bolatyn.

Budan buryn Memleket basshysy Sinovation Ventures jáne 01ai kompanııalarynyń bas dırektory Lı Kaı Fýdy qabyldady. Kezdesý barysynda jasandy ıntellekt, tsıfrlyq transformatsııa, venchýrlyq ınvestıtsııa, startaptar ekojúıesiniń básekege qabilettiligin arttyrý jáne jahandyq tehnologııalyq seriktesterdi tartý salalaryndaǵy yntymaqtastyq máseleleri talqylandy.