Qytaıda jasandy ıntellektini etıkalyq retteýdiń jańa erejeleri bekitildi
ASTANA.KAZINFORM - Qytaı bıligi jasandy ıntellekt salasyndaǵy etıkalyq retteýge qatysty jańa erejeni kúshine engizdi. Qujat qaýipsizdik, ádildik jáne ınnovatsııalarǵa jaýapkershilikpen qaraýdy qamtamasyz etýge baǵyttalǵan. Bul týraly Kazinform agenttiginiń Beıjińdegi menshikti tilshisi habarlady.
Jańa normalar Qytaı aýmaǵynda júrgiziletin jasandy ıntellekt salasyndaǵy barlyq ǵylymı zertteýler men tehnologııalyq ázirlemelerge qatysty. Qujat adamnyń qadir-qasıetine, qoǵamdyq tártipke, ekologııaǵa jáne derbes derekter qaýipsizdigine yqpal etýi múmkin jobalardy qamtıdy.
Erejege sáıkes, joǵary oqý oryndary, zertteý ortalyqtary men jekemenshik kompanııalar ishki etıkalyq komıtetter qurýǵa mindetti. Bul qurylymdardyń quramyna tehnologııa, quqyq jáne etıka salasyndaǵy mamandar engizilip, olardyń mindeti – qyzmetti baqylaý jáne táýekelderdiń aldyn alý.
Generatıvti jasandy ıntellekt pen algorıtmdik usynymdar salasyndaǵy iri jobalar úshin saraptamalyq tekserý júıesi engiziledi. Tótenshe jaǵdaılar týyndaǵan kezde 36-72 saǵat aralyǵynda jedel aýdıt júrgizý tártibi qarastyrylǵan.
Erejeniń saqtalýyn salalyq mınıstrlikter men óńirlik basqarý organdary qadaǵalaıdy. Etıkalyq normalar men derekter qaýipsizdigi talaptaryn buzǵandar Qytaıdyń kıberqaýipsizdik týraly qoldanystaǵy zańnamasyna sáıkes jaýapqa tartylady.
Buǵan deıin Qytaı gýmanoıdty robototehnıka men engizilgen jasandy ıntellekt boıynsha ulttyq standarttar júıesin bekitken bolatyn.