Qytaıda jasandy ıntellekt jasaǵan aktrısa tanymal bolyp keledi
ASTANA. KAZINFORM - Qytaıda jasandy ıntellekt arqyly jasalǵan aktrısa basty róldi somdaıtyn «Jumystan shyǵarylǵan qyz» atty shaǵyn serıal 250 mln-nan astam qaralym jınady. Al keıipkerdiń Douyin áleýmettik jelisindegi jeke paraqshasyna bir aıda jarty mıllıonǵa jýyq adam jazyldy, dep habarlaıdy Kazinform agenttiginiń Beıjińdegi menshikti tilshisi.
Serıaldyń sıýjeti boıynsha 20 jastaǵy aýyldan shyqqan Fan Taotszy model bolýdy armandap, megapolıske keledi.
Alaıda ol munda qatań básekelestikke tap bolady.
Bir kúni ony ortaq sýretten ádeıi qıyp tastaıdy. Osy oqıǵadan keıin keıipkerdiń ómiri kúrt ózgeredi.
Jobany My Film MCN agenttigi iske qosqan.
12 maýsymdaǵy premeradan beri serıaldyń Douyin platformasyndaǵy qaralymy 250 mln-nan asty. Douyin – Qytaıdaǵy TikTok platformasynyń balamasy.
Serıal týraly áleýmettik jelilerdegi jarııalanymdar men jazbalardyń sany 800 mln-nan asyp ketken.
Fan Taotszynyń beınesi tolyǵymen jasandy ıntellekt algorıtmderi arqyly jasalǵan.
Keıipkerdiń basty ereksheligi – túzý kekili men betindegi eki meńi.
Tájirıbesiz aýyl qyzynyń beınesi 18-35 jastaǵy jas áıelder aýdıtorııasynyń kóńil-kúıi men suranysyna dál kelgen.
Serıaldyń jetistiginen keıin 14 maýsymda Fan Taotszyǵa jeke áleýmettik jeli paraqshasy ashyldy.
Paraqsha qarapaıym adamnyń vıdeoblogy retinde júrgiziledi.
Jasandy ıntellekt jasaǵan aktrısa tańǵy as ázirleıdi, sportpen aınalysady, saıahattaıdy jáne ınternet arqyly taýar satady.
Qazir onyń paraqshasyna 478 myń qoldanýshy jazylǵan.
Fan Taotszy qatysatyn uzaqtyǵy 60 sekýndtan asatyn jarnamalyq vıdeonyń baǵasy 258 myń ıýanǵa ($38,2 myń) deıin jetedi.
Bul soma kóptegen shynaıy ınflıýenserlerdiń jarnamalyq qyzmet qunynan áldeqaıda joǵary.
Buǵan deıin qazaqstandyq mektep dırektorlary Qytaıdyń bilim júıesindegi JI tájirıbesin zerdelegen bolatyn.
