Qytaıda jasandy ıntellekt óndiris pen eksporttyń ósýine yqpal etti
ASTANA. KAZINFORM — Qytaıda jasandy ıntellekt tehnologııalary qarqyndy damyp, ekonomıkanyń ósýi men ónerkásiptiń jańǵyrýyna tyń serpin berdi. Bul týraly QHR Memlekettik statıstıka basqarmasynyń ókili Van Gýanhýa málimdedi, dep habarlaıdy Kazinform agenttiginiń Beıjińdegi menshikti tilshisi.
Vedomstvo málimetinshe, 2026 jyldyń alǵashqy toǵyz aıynda tsıfrlyq ónim óndirisi Qytaıdyń iri ónerkásip salasynyń ósimine 33 paıyzdan astam úles qosty. Osy kezeńde ıntegraldyq shemalar óndirisi 23,3 paıyz, al aqyldy ónerkásiptik jabdyqtar óndirisi 30,6 paıyz artty.
Jasandy ıntellektiniń damýy qyzmet kórsetý salasynyń ósimine de yqpal etti. Neırondyq jelilerdi oqytýǵa, algorıtmder men esepteý qýattaryna suranystyń artýyna baılanysty aqparattyq tehnologııalar jáne baǵdarlamalyq qamtamasyz etý salasyndaǵy qosylǵan qun bir jylda 10,4 paıyz ósti.
Qytaıda ozyq tehnologııalarǵa suranys artyp, JI bar kózildirik pen smart-saǵat sııaqty qurylǵylardyń iri saýda jelilerindegi satylymy 70 paıyzdan asty. Al qyzmetkersiz jumys isteıtin avtomattandyrylǵan dúkenderdegi saýda kólemi 25 paıyzdan astam ósti.
Jasandy ıntellektini qoldaný aıasynyń keńeıýi ınvestıtsııa men eksporttyń ósýine yqpal etti. Elektrondy shemalar óndirisine salynǵan ınvestıtsııa 58,7 paıyzǵa, al Qytaıdyń elektrondyq komponentter eksporty 70 paıyzǵa artty.
Van Gýanhýanyń aıtýynsha, Qytaıdyń tolyq óndiristik tizbegi, mol derekter qory men aýqymdy ishki naryǵy JI tehnologııalaryn odan ári damytýǵa jáne keńinen engizýge qolaıly jaǵdaı jasaıdy.
Buǵan deıin Qytaıda jasandy ıntellektiniń damýyna baılanysty jańa mamandyqtar tizimi keńeıtilgeni habarlanǵan edi.
