Qytaıda jaryq shyǵaratyn ósimdikter ósirilip jatyr
ASTANA. KAZINFORM — Beıjińde bıyl kúzde aýmaǵy 7 myń sharshy metr bolatyn erekshe jylyjaı ashylady. Munda kelýshiler qarańǵyda jaryq shyǵaratyn ósimdikterdi kóre alady. Jylyjaıda jarqyraǵan dámhana men bıolıýmınestsentti ósimdikterden jasalǵan jaryq dálizi bolady, dep habarlady BelTA.
Qytaıdyń Magicpen Biotechnology kompanııasy osyndaı ósimdikterdiń 10-nan astam túrin óndirdi. Olardyń qatarynda petýnııa, temeki jáne terek bar.
Qazirgi býyn ósimdikteri tolyq aı kezinde álsiz jasyl jaryq shyǵarady. Bul jaryq aısyz nemese bultty túnderde anyq baıqalady. Al úshinshi býynda jasandy ıntellekt lıýmınestsentsııa mehanızmin ońtaılandyryp, aı sáýlesi álsiz bolǵan kezde de ósimdikterdiń turaqty jaryq shyǵarýyn qamtamasyz etedi.
Ǵalymdar jasandy ıntellekt kómegimen olardyń jaryǵyn kúsheıtip, túrli tústi, sondaı-aq sýyq pen qurǵaqshylyqqa tózimdi ósimdikter jasaý jumystaryn júrgizip jatyr.
Ázirleýshilerdiń aıtýynsha, bul ósimdikter qorshaǵan ortaǵa qaýipsiz. Lıýmınestsentti gender tuqym men tozań arqyly taralmaıdy, al jylyjaılar jándikterden qorǵalǵan.
Bolashaqta ǵalymdar jaryq shyǵaratyn ósimdikterdi saıabaqtar men joldardy túnde jaryqtandyrý úshin paıdalanýdy josparlap otyr. Bul elektr energııasynyń shyǵynyn azaıtýǵa múmkindik beredi.
Aıta keteıik, Qytaıda quramynda germanıı mólsheri joǵary jańa mıneral tabyldy.
