Qytaıda jańadan salynyp jatqan týnnel qulap, tórt adam qaza tapty
ASTANA. KAZINFORM – Qytaıdyń soltústigindegi Іshki Mońǵolııa avtonomııalyq aýdanynda salynyp jatqan týnnel qulap, tórt adam qaza tapty. Alty adam jaraqat aldy, dep habarlaıdy Kazinform agenttiginiń Beıjińdegi tilshisi Xinhua agenttigine silteme jasap.
Oqıǵa juma kúni jergilikti ýaqyt boıynsha shamamen tańǵy saǵat 3:50-de Ýlanchab qalalyq okrýgi Chjotszy aýdanyndaǵy qurylys alańynda boldy. Merdiger – memlekettik menshiktegi China Railway 15th Bureau Group Co., Ltd. kompanııasy.
Oqıǵa ornynda izdeý-qutqarý jumystary túske deıin aıaqtaldy. Zardap shekkenderge medıtsınalyq kómek kórsetilip jatyr. Olardyń jaǵdaıy belgisiz.
Aımaq bıligi apattyń sebebin anyqtaý úshin arnaıy komıssııa qurdy. Quqyq qorǵaý organdary qazirdiń ózinde oqıǵa ornyndaǵy qaýipsizdikke jaýapty adamdardy ustady.
Buǵan deıin Qytaıdyń Fýtszıan provıntsııasy Tsıýanchjoý qalasyna qarasty Tszıntszıan ýezdik qalasyndaǵy aıaq kıim fabrıkasynda bolǵan órt saldarynan 28 adam qaza tapqanyn jazǵan edik.
