Qytaıda jańa mıkroserıaldardyń 90%-dan astamy JI kómegimen jasalady
ASTANA. KAZINFORM — Jyl basynan beri Qytaıda jaryq kórgen jańa mıkroserıaldardyń 90%-dan astamy jasandy ıntellekt arqyly jasalǵan. Bul týraly Beıjińdegi Kazinform agenttiginiń menshikti tilshisi Xinhua agenttigine silteme jasap habarlaıdy.
Qytaıdyń Radıo jáne teledıdar isteri jónindegi memlekettik basqarmasynyń málimetinshe, bıyl qańtar-tamyz aılarynda 430 myń qysqametrajdy serıal efırge shyqqan. Bul ótken jyldyń tolyq kórsetkishinen 13 ese kóp.
Retteýshi organnyń deregine súıensek, Qytaıda qysqametrajdy serıaldardy 800 mıllıonnan astam adam tamashalaıdy. Ótken jyly osy naryqtyń kólemi 100 mıllıard ıýan (14 mıllıard dollardan astam) bolǵan.
— Jasandy ıntellekt tehnologııalary mıkroserıaldardy jańa tásilmen jasaýǵa, shyǵyndardy qysqartyp, óndiris tıimdiligin arttyrýǵa múmkindik berdi. Alaıda bul kontent sapasy men avtorlyq quqyqty qorǵaýǵa qatysty jańa máselelerdiń týyndaýyna da sebep boldy, — dep atap ótti vedomstvo.
Esepti kezeńde baqylaý sharalary kúsheıtilip, talaptardy buzǵan 68 myń mıkroserıal óshirildi, 1,2 myńnan astam akkaýntqa qatysty shara qabyldandy. Sonyń ishinde buǵattalǵan kontenttiń 90%-dan astamy jasandy ıntellekt arqyly jasalǵan jobalarǵa tıesili.
1 qyrkúıekten bastap Qytaıda jańa ereje kúshine enedi. Oǵan sáıkes, mınıserıal óndirýshiler men onlaın-vıdeoservıster JI arqyly jasaǵan kontentti arnaıy belgimen kórsetýge mindetti. Sondaı-aq platformalar ózderinde jarııalanatyn ónimderdiń sapasyn baqylaýǵa tikeleı jaýap beredi.
Buǵan deıin Qytaıda jasandy ıntellekt jasaǵan aktrısanyń tanymaldylyǵy artqany habarlanǵan bolatyn.
Aqzat Jıenalına
