Qytaıda jańa býyndaǵy neırokompıýter tanystyryldy

ASTANA. KAZINFORM — Qytaı ınjenerleri janýarlar mıynyń jumysyn elikteı alatyn jańa býyndaǵy neıromorfty kompıýterdi – Darwin Monkey atty qurylǵyny tanystyrdy, dep habarlaıdy Sınhýa. 

Bul qurylǵy Qytaıdyń shyǵysyndaǵy Chjetszıan provıntsııasynda ornalasqan Chjetszıan ýnıversıtetiniń ǵylymı ortalyǵynda jasalǵan. Kompıýter Darwin 3 dep atalatyn úshinshi býyndaǵy 960 neıroprotsessormen jabdyqtalǵan. Standartty júktemede onyń energııa tutynýy shamamen 2000 Vt.

Júıe 2 mıllıardtan astam pýlsatsııalaıtyn neırondy jáne 100 mıllıardtan astam sınapsty qoldaı alady. Bul kórsetkishter Darwin Monkey-di logıkalyq oılaý, kórý, estý, til jáne oqytý fýnktsııalaryn biriktire alatyn álemdegi alǵashqy neıromorfty kompıýter etedi.

Qazirgi ýaqytta platformaǵa neırojelilik qosymshalar ornatylǵan. Qurylǵy DeepSeek modelin iske qosyp, logıkalyq taldaý, kontent generatsııasy jáne matematıkalyq esepterdi sheshý sııaqty tapsyrmalardy oryndaı alady.

Darwin Monkey-diń esepteý qýaty tiri organızmderdiń – qurttar men balyqtardan bastap tyshqandar men prımattarǵa deıingi – mı modelin naqty beıneleýge múmkindik beredi. Bul jańalyq neıroǵylym men mıdy modeldeýge qatysty zertteýlerge tyń serpin bermek.

Buǵan deıin AQSh pen Qytaıdyń jasandy ıntellekt salasynda kóshbasshylyqqa shyqqany habarlanǵan bolatyn.

Aıta ketelik Qazaqstandyq sýperkompıýterdiń qýaty 8 mlrd halyqtyń 4 kúndik jumysyna teń.