Qytaıda jalǵyz turatyndarǵa arnalǵan «Óldi me?» qosymshasyn júktep alýshylar kóbeıgen

ASTANA. KAZINFORM – Qytaıda jalǵyz turatyn azamattarǵa arnalǵan «Óldi me?» dep atalatyn mobıldi qosymsha keıingi ýaqytta keńinen tanylyp, Qytaıdaǵy Apple App Store platformasynyń aqyly qosymshalar reıtınginde birinshi orynǵa shyqty, dep habarlady Lianhe Zaobao basylymy. 

Jergilikti buqaralyq aqparat quraldarynyń habarlaýynsha, «Óldi me?» – jalǵyz turatyn adamdardyń qaýipsizdigin qadaǵalaýǵa arnalǵan jeńil ári qarapaıym tsıfrlyq qural. Qosymshanyń negizgi maqsaty – paıdalanýshynyń kúndelikti belsendiligin tirkeý arqyly tótenshe jaǵdaılardyń aldyn alý. Qosymshanyń baǵasy – 8 ıýan (600 teńge). 

Paıdalanýshy qosymshada aty-jónin jáne tótenshe jaǵdaıda habarlasatyn adamnyń elektrondyq poshtasyn kórsetip, kún saıyn júıege kirip, tirkelý belgisin qoıýy qajet.

Eger qoldanýshy eki kún qatarynan tirkelmese, júıe kelesi kúni avtomatty túrde habarlama jiberedi. Al birneshe kún boıy belsendilik baıqalmaǵan jaǵdaıda, eskertý tótenshe baılanys tulǵasyna joldanady. 

Resmı tirkeý derekterine sáıkes, «Óldi me?» qosymshasyn Yuejing (Zhengzhou) Technology Service Co., Ltd. kompanııasy ázirlegen. Kompanııa ótken jyldyń naýryz aıynda qurylǵan, tirkelgen kapıtaly – 100 myń ıýan. Jobany 1995 jyldan keıin týǵan úsh jas kásipker iske qosqan. Kompanııa qazirgi tańda jobanyń tabysty jumys istep turǵanyn habarlady.

Qosymshanyń resmı tanystyrylymynda negizgi paıdalanýshylar retinde Qytaıdyń birinshi jáne ekinshi deńgeıli qalalarynda jalǵyz turatyn jas azamattar kórsetilgen.

Sonymen qatar Beike Research Institute jarııalaǵan «Jańa jalǵyz turý dáýiri» atty zertteý esebine sáıkes, 2030 jylǵa qaraı Qytaıdaǵy jalǵyz turatyn halyq sany 150–200 mıllıon adamǵa jetýi múmkin. Al 20–39 jas aralyǵyndaǵy jalǵyz turatyn jastar sany 2010 jylǵy 18 mıllıonnan 40–70 mıllıonǵa deıin ósedi dep boljanyp otyr. 

Sarapshylardyń pikirinshe, jalǵyz turatyn adamdar sanynyń artýy qaýipsizdik pen áleýmettik qoldaýǵa baǵyttalǵan tsıfrlyq servısterge degen suranysty kúsheıtken. 

Aıta keteıik, Qytaı 2027 jylǵa qaraı ulttyq jasandy ıntellekt ındýstrııasyn álemdik kóshbasshyǵa aınaldyrýdy, sondaı-aq ónerkásipte ıntellektýaldy tehnologııalardy engizýdi keńeıtýdi josparlap otyr.