Qytaıda jaǵajaıdaǵy Azııa oıyndarynyń ashylý saltanaty ótti
ASTANA. KAZINFORM – Qytaıdyń Sanıa qalasynda 2026 jylǵy VI jaǵajaıdaǵy Azııa oıyndarynyń ashylý saltanaty ótti. Bul týraly UOK habarlady.
Bul kópsalaly doda sońǵy ret Vetnamnyń Danang qalasynda ótkennen keıin araǵa on jyl salyp, Azııa Olımpıadalyq keńesi kúntizbesine qaıta oraldy.
Ashylý rásimi Tianya Haijiao jaǵalaý aımaǵynda uıymdastyryldy. Shoýdyń formaty dástúrli stadıondyq úlgiden ózgeshe boldy. Negizgi kórinister tikeleı teńiz jaǵasynda ótti. Al kórermen sahnaǵa óte jaqyn ornalasty.
Sportshylar sherýinde Qazaqstan quramasynyń Tý ustaýshylary sý dobynyń oıynshysy Murat Shákenov pen Dıana Erjanova (akvatlon) boldy. Jalpy, elimiz Sanıada toǵyz sport túri boıynsha synǵa túsedi.
Ashylý saltanatynyń tujyrymdamasy ómir qýaty, ashyqtyq, teńiz ben aspannyń toǵysýy ıdeıalaryna negizdeldi. Kórkemdik ári sahnalyq sheshimder arqyly uıymdastyrýshylar Haınan aralyn tabıǵatqa baı óńir retinde tanystyryp, sport arqyly Azııa elderiniń birligin aıqyndady.
Shoýdyń kórneki bóliginde zamanaýı tehnologııalar Qytaıdyń mádenı elementterimen úılesim tapty. Qoıylym barysynda stsenarııge engizilgen robottandyrylǵan elementter, túrli arnaıy effektiler jáne adam men tabıǵat úılesimin beıneleıtin teńiz janýarlary pishinindegi iri kórkem ınstallıatsııalar qoldanyldy. Saltanat sońynda 2026 jylǵy jaǵajaı Azııa oıyndarynyń alaýy saltanatty túrde jaǵyldy.
Aıta keteıik, jaǵajaı Azıadasy 22-30 sáýir aralyǵynda ótedi. Oǵan shamamen 1790 sportshy qatysady. Jarystar Sanıa shyǵanaǵynyń boıyndaǵy segiz aımaqta, osy attas ózende jáne qalanyń sport ortalyǵynda uıymdastyrylady. Negizgi nazar burynnan bar nysandardy tıimdi paıdalaný men jańǵyrtýǵa aýdarylǵan. Qytaı bul oıyndardy tarıhynda ekinshi ret qabyldap otyr: buǵan deıin kópsalaly doda 2012 jyly Haııan qalasynda ótken.
Aıta ketelik Farýh Toqtasynov bokstan álem kýbogynda sensatsııa jasady.
