Qytaıda velosıped óndirisiniń jalpy kólemi 110 mln danadan asty
ASTANA. KAZINFORM — Juma kúni jarııalanǵan málimetterge sáıkes, 2025 jyly Qytaıdyń velosıped ónerkásibinde óndiris turaqty ósim kórsetti. Jalpy óndiris kólemi 110,8 mln danaǵa jetip, jyldyq eseppen 11,3 paıyzǵa artqan, dep habarlaıdy Sınhýa.
Bul derekter Shanhaıda ótip jatqan 34-shi Qytaı halyqaralyq velosıped kórmesi aıasynda jarııalandy. Velosıped salasyndaǵy ekologııalyq tazalyq, ıntellektýaldandyrý jáne joǵary sapaly ónim óndirý baǵytyndaǵy jahandyq úrdisterge sáıkes, bıylǵy kórmede eń jańa velosıpedter men salanyń jańa damý baǵyttary tanystyryldy.
Qytaı velosıped qaýymdastyǵy vıtse-prezıdenti ári bas hatshysy Go Venıýıdiń aıtýynsha, 2025 jyly Qytaıdyń jetekshi velosıped kásiporyndarynyń tabysy 2024 jylmen salystyrǵanda 9 paıyzǵa ósken, al paıda kólemi aıtarlyqtaı artqan.
2025 jyly Qytaı shetel naryqtaryna shamamen 48,94 mln velosıped eksporttady.
Bul ótken jylmen salystyrǵanda 2,4 paıyzǵa kóp jáne turaqty ósim qarqyny saqtalǵanyn kórsetedi.
Velosıped bólshekteriniń eksporty 3,63 mlrd AQSh dollar bolyp, 2024 jylmen salystyrǵanda 10,6 paıyzǵa artqan. Bul salanyń joǵary nátıjelerge qol jetkizgenin baıqatady.
— Velosıped sektory tutynýdyń jańa múmkindikterin ashyp jatyr, al qoldaný aıasynyń ártúrliligi naryqtaǵy naqty suranysty yntalandyryp otyr, — dedi Go Venıýı.
2025 jyly Qytaı boıynsha barlyǵy 101 velojarys ótkizilgen. Bul 2024 jylmen salystyrǵanda 23 paıyzǵa kóp. Jarystarǵa 1 mln-nan astam adam qatysqan. Eldegi áýesqoı veloklýbtardyń sany 80 myńnan asyp, velosıpedke arnalǵan jabdyqtar naryǵynyń qarqyndy ósýine yqpal etip otyr.
El boıynsha ortaq paıdalanylatyn velosıpedtermen kún saıynǵy sapar sany 120 mln-ǵa jetedi. Bul qalalyq kólik júıesin tolyqtyryp, jumysqa barý men qysqa qashyqtyqtaǵy saparlarǵa degen suranysty tıimdi qanaǵattandyrýǵa múmkindik beredi.
2025 jyly eski elektrli velosıpedterdi jańasyna treıd-ın baǵdarlamasy arqyly aýystyrý júıesi kúshine endi. Sonymen qatar elektrli velosıpedterge arnalǵan jańa memlekettik qaýipsizdik standarty qabyldandy. Statıstıkalyq málimetterge sáıkes, ótken jyly osy baǵdarlama aıasynda 12,5 mln-nan astam elektrli velosıped satylǵan. Bul 2024 jylǵy kórsetkishten 10 ese joǵary.
— Bul standarttar naryqtaǵy belsendilikti arttyryp qana qoımaı, búkil velosıped salasyna ulttyq deńgeıde qaýipsizdik talaptaryn engizdi. Sonyń arqasynda salanyń sapasy men tıimdiligi artyp, joǵary sapaly damýyna jol ashylady, — dep qosty Go Venıýı.
Aıta ketelik Qytaıda zaýyttaǵy jarylystan qaza tapqandar sany 37 adamǵa jetken edi.
