Qytaıda «Uly dala kóshpelileriniń mádenıeti» kórmesi ashyldy
ASTANA. KAZINFORM – Qytaıdyń Hanchjoý qalasyndaǵy Chjetszıan provıntsııasynyń mýzeıinde Qazaqstan Respýblıkasy Ulttyq mýzeıiniń «Uly dala kóshpelileriniń mádenıeti» kórmesiniń saltanatty ashylýy ótti, dep habarlaıdy QR Mádenıet jáne aqparat mınıstrliginiń baspasóz qyzmeti.
Kórmege qoıylǵan 279 biregeı arheologııalyq jádiger kópshilikti Qazaqstan aýmaǵyn mekendegen ejelgi jáne ortaǵasyrlyq kóshpeli halyqtardyń tarıhymen, ónerimen jáne mádenı murasymen tanystyrady.
Ashylý rásimine Qazaqstan Respýblıkasynyń Shanhaı qalasyndaǵy Bas konsýly Nurlan Aqqoshqarov, Beıjińdegi Qazaq mádenı ortalyǵynyń ókilderi, Qazaqstan Respýblıkasy Ulttyq mýzeıiniń basshylyǵy, Qytaı mýzeıleriniń dırektorlary, ǵalymdar, arheologtar men mádenıettanýshylar qatysty.
Ekspozıtsııa úsh taqyryptyq bólimnen turady. Onda qola dáýirinen bastap orta ǵasyrǵa deıingi kezeńdi qamtıtyn zergerlik buıymdar, qarý-jaraq, eńbek quraldary, torevtıka, keramıka jáne mata úlgileri usynylǵan. Bul jádigerler saq, úısin, ǵun, qańly jáne túrki taıpalarynyń mádenıetin jáne Uly Jibek joly boıyndaǵy qalalardyń órkendeý tarıhyn aıshyqtaıdy.
Kórmeniń eń kórnekti jádigerleriniń qatarynda Esik qorǵanynan tabylǵan «Altyn adamnyń» rekonstrýktsııasy, Qańly memleketiniń aqsúıek áıeli men ǵun jaýyngeriniń beıneleri bar. Shilikti qorǵanynan, Jalaýly jáne Qarǵaly qazynalarynan tabylǵan altyn buıymdar, Arys ózeni ańǵary men Kúltóbe qalashyǵynan alynǵan arheologııalyq oljalar, XIII ǵasyrdyń sońy – XIV ǵasyrdyń basyna jatatyn jibek matalardyń bólikteri de kópshilik nazaryna usynylǵan.
Kórmeniń ashylýy aıasynda Qazaqstan Respýblıkasy Ulttyq mýzeıi men Chjetszıan provıntsııalyq mýzeıi yntymaqtastyq týraly memorandýmǵa qol qoıdy. Qujat birlesken ǵylymı zertteýler júrgizýdi, Uly Jibek jolynyń tarıhı eskertkishterin zerdeleýdi, tájirıbe almasýdy jáne arheologııalyq ekspedıtsııalar uıymdastyrýdy kózdeıdi.
Joba Qazaqstan men Qytaı arasyndaǵy mádenı yntymaqtastyq aıasynda jáne eki el arasyndaǵy dıplomatııalyq qatynastardyń ornaǵanyna 35 jyl tolýy qarsańynda uıymdastyryldy.
«Uly dala kóshpelileriniń mádenıeti» kórmesi Chjetszıan provıntsııasynyń mýzeıinde 2026 jylǵy 11 qazanǵa deıin jumys isteıdi.
Osyǵan deıin Astanada Qytaıdyń jibek ónerin tanytatyn halyqaralyq kóshpeli kórme ashylǵan bolatyn.
