Qytaıda turǵyn úı ǵımaratynda bolǵan órtten segiz adam qaza tapty

ASTANA. KAZINFORM — Seısenbi kúni keshke Qytaıdyń ońtústigindegi Gýandýn provıntsııasynyń Shantoý qalasyndaǵy turǵyn úı ǵımaratynda bolǵan órtten segiz adam mert boldy, dep habarlaıdy Sınhýa.

— Órt qalanyń Chaonan aýdanynda saǵat 21:20–da bastalyp, shamamen saǵat 22:00–de sóndirildi, — delingen aýdandyq órt sóndirý jáne qutqarý qyzmeti sársenbi kúni tańerteń jarııalanǵan habarlamada. 

Órt saldarynan segiz adam qaza taýyp, tórteýi jaraqat aldy. Zardap shekkenderdiń barlyǵy medıtsınalyq kómek alý úshin dereý aýrýhanaǵa jetkizildi. 

Aldyn ala tergeý kezinde zaqymdalǵan turǵyn úı tórt qabatty temirbeton qurylysy ekeni, órttiń aýdany shamamen 150 sharshy metrdi quraǵany anyqtaldy. 

Qazirgi kezde oqıǵanyń sebebi anyqtalyp jatyr. 

Buǵan deıin Atyraýda kópqabatty úıde órt shyǵyp, 11 adam qutqarylǵanyn jazǵan bolatynbyz.