Qytaıda turatyn qazaq jigiti «alyp» traktor qurastyrdy
ASTANA. KAZINFORM – Qytaıdyń Qumyl aımaǵy Barkol qazaq avtonomııaly aýdanynda turatyn qandasymyz Janat Ylaıyquly qýaty 460 at kúshi bolatyn «alyp» traktor qurastyryp shyqty. Ol ózi qurastyrǵan kólikti áleýmetti jeli arqyly tanystyrdy.
Onyń aıtýynsha, «BARS 4604» dep atalatyn bul traktor ózgeshe múmkindikterimen erekshelenedi.
«Bul jobany zerttegenime birneshe jyl boldy. Sońǵy 3 aıdyń ishinde bólshekterin syzba boıynsha zaýyttarǵa tapsyrys berip, qurastyryp, daıyndadym. «BARS» - meniń kompanııamnyń aty, 460 – at kúshin bildiredi, 4 – tórt dońǵalaǵy tartady degen maǵynada. At kúshi joǵary bolǵandyqtan jer jyrtý úshin paıdalanýǵa arnap jasadym. Mehanıkalyq berilis qoraptaryna ózgeris engizdim. Sonymen qatar traktordyń taǵy bir ereksheligi, munda eki rýl bar. Qazirge deıin basqa traktorlarda joq qosymsha rýl óte qolaıly, júrgizýshiniń jumysyn kóp jeńildetedi», - deıdi Janat Ylaıyquly.
