Qytaıda turatyn qandasymyz Toqtarbek Tańatqan Azıada altynyna talasady
Qytaıda týyp, bokstan sol eldiń namysyn qorǵap júrgen qandasymyz - Toqtarbek Tańatqan búgin Hanjchoýdaǵy Azııa oıyndarynyń fınalynda altynǵa talasady, dep habarlaıdy QazAqparat tilshisi.
80 keli salmaqta baq synap júrgen qazaq balasy jartylaı fınalda jastar arasynda 2022 jyly ótken álem chempıonatynyń jeńimpazy, ózbekstandyq Týrabek Habıbýllaevty 4:1 esebimen tize búktirdi.
Endi Toqtarbek Azıada altyny úshin fılıppındik boksshy Eýmır Felıks Marsıalmen qolǵap túıistiredi.
Aıta keteıik, qytaı namysyn qorǵap júrgen qandasymyz fınalda súringen jaǵdaıdyń ózinde kúmis medaldan bólek Parıj olımpıadasynyń joldamasyn da qanjyǵalap tur.
Toqtarbek Tańatqan bul jarystyń 1/8 fınalynda qazaqstandyq Nurbek Oralbaıdy jarys jolynan shyǵaryp tastaǵan bolatyn.
Alaıda, ol Ózbekstan astanasynda ótken 2023 jylǵy álem chempıonatynda fınalǵa deıin súrinbeı jetkenimen, sheshýshi synda Oralbaıǵa utylyp, kúmis júldeger atanǵan.
Esterińizge sala keteıik, Toqtarbek Tańatqan qytaıdaǵy qazaqtar jıi qonystanǵan Altaı aımaǵy Alaǵaq qalashyǵyna qaraıtyn Taralań degen aýylda 1996 jyly 18 qarashada qarapaıym otbasynda dúnıege kelgen.
Toqtarbek Tańatqan 2017 jyly qazan aıynda bokstan qytaıdyń ulttyq quramasyna qabyldanǵan.
Ol Qytaıdyń memlekettik ulttyq quramasyna qosyla sala birden 75 keli salmaqta baq synaıdy. Keıinnen ulttyq qurama bapkerleri ony Tokıo Olımpıadasyna daıyndaýǵa kirisedi.
Bul oraıdy múlt jibermegen Toqtarbek Olımpıada oıyndaryna joldama sarapqa salynǵan dodada kózdegenine jetip, jahandyq dodaǵa qatysýǵa múmkindik alady.
Ókinishke qaraı, Tokıo tórinde Toqtarbektiń baǵy janbady.
Aıtpaqshy, Toqtarbek Tokıo Olımpıadasyna deıin «Qytaıdyń boks koroli» ataǵyn 2017, 2019, 2020 jáne 2021 jyldary tórt ret jeńip aldy.
Bul — Qytaıdyń ózi ishinde ǵana ótetin eń bedeldi jarystardyń biri. Syıaqysy da qomaqty.
Toqtala ketetin jaıt, Toqtarbek — Qytaı qazaqtary arasyndaǵy boksshylardan Olımpıada oıyndaryna qatysqan ekinshi qazaq balasy.
Odan buryn kásipqoı boksshy Qanat Islam qytaı týy astynda 2004 jyly Afına Olımpıadasyna qatysqanyn, 2008 jyly Beıjiń Olımpıadasynda qanjyǵasy qola medalmen «maılanǵanyn» bilemiz.
Mine, osy Qanattan keıin Qytaıdaǵy qandastar arasynan Toqtarbek ekinshi ret Olımpıada oıyndaryna qatysqan boksshy boldy.
Búgin Azıada oıyndarynda taǵy da kelesi Parıj olımpıadasynyń joldamasyn jeńip alyp otyr.
