Qytaıda tsıfrlyq ıýanǵa arnalǵan halyqaralyq operatsııalyq ortalyq qurylady

ASTANA. KAZINFORM — Qytaıda tsıfrlyq ıýanǵa arnalǵan halyqaralyq operatsııalyq ortalyq qurylady. Bul týraly sársenbi kúni Shanhaıdaǵy Lýtszıatszýı forýmynda Qytaı Halyq bankiniń tóraǵasy Pan Gýnshen málimdedi, dep jazady Sınhýa.

Onyń aıtýynsha, bul ortalyqtyń maqsaty — tsıfrlyq ıýandy ınternatsıonaldandyrýǵa, qarjy naryǵyndaǵy qyzmetterdi damytýǵa jáne tsıfrlyq qarjy salasyndaǵy ınnovatsııalardy qoldaýǵa yqpal etý.

Ortalyqtyń ashylýy — Shanhaıda qabyldanatyn segiz bastamanyń biri ekeni aıtyldy.

Pan Gýnshenniń málimdeýinshe, qalada sonymen qatar bankaralyq naryqtaǵy mámileler týraly esepterdi jınaıtyn jáne ártúrli qosalqy naryqtardaǵy (oblıgatsııalar, valıýtalar, derıvatıvter) belsendilikti taldaıtyn arnaıy esep repozıtorııi qurylady. Bul makroekonomıkalyq saıasatty ázirleý men qarjy naryqtaryna baqylaý jasaýdy jaqsartýǵa múmkindik beredi.

Shanhaıda jeke tulǵalardyń nesıe tarıhy jónindegi agenttik te qurylady. Ol qarjy mekemelerine ártúrli jáne jekelendirilgen nesıe ónimderin usynýǵa múmkindik beredi. Bul eldegi áleýmettik nesıe júıesin jetildirýge yqpal etpek.

Sondaı-aq, Shanhaıdyń erkin saýda aımaǵy — Lınganda offshorlyq saýdany damytý maqsatynda qarjy qyzmetterin keshendi reformalaýǵa baǵyttalǵan pılottyq baǵdarlama iske qosylady. Baǵdarlama sheńberinde bıznes júrgizýge arnalǵan ınnovatsııalyq erejeler engizilmek.

Qalǵan sharalarǵa erkin saýdaǵa arnalǵan offshorlyq oblıgatsııalardy ázirleý, kásiporyndarǵa arnalǵan qarjylandyrý arnalarynyń keńeıýin qamtamasyz etý, transshekaralyq saýda men ınvestıtsııany jeńildetý maqsatynda saýda shottarynyń júıesin ońtaılandyrý kiredi.

Budan buryn habarlanǵandaı, Qytaı Ortalyq banki maýsym aıynda bank júıesine 195 mlrd dollar qosty.