Qytaıda transulttyq qylmystyq toptyń tórt basshysy ólim jazasyna kesildi
ASTANA. KAZINFORM – Qytaı bıligi Mıanmanyń soltústiginde áreket etken, Baı klanyna tıesili transulttyq uıymdasqan qylmystyq toptyń tórt basshysyna qatysty ólim jazasyn oryndady, dep habarlaıdy Xinhua.
Sot protsesi 2025 jylǵy qarasha aıynda bastaldy. Birinshi satydaǵy sot Baı Sochen, Baı Intsan, ıAn Lıtsıan, Hý Sıaotszıan jáne Chen Gýandi qasaqana adam óltirý, adam urlaý, zańsyz qumar oıyn bıznesin uıymdastyrý, sondaı-aq asa iri kólemde esirtki óndirý jáne ótkizý faktileri boıynsha kináli dep tanydy.
Tergeý materıaldaryna sáıkes, Baı qylmystyq qaýymdastyǵynyń qarjylyq aınalymy iri halyqaralyq korporatsııalardyń kórsetkishterimen shamalas bolǵan. Alaıaqtyq koll-ortalyqtar men onlaın-kazınolardy qosa alǵanda, UQT baqylaýyndaǵy kóleńkeli qurylymdar arqyly ótken qarjy kólemi 29 mlrd ıýannan asty, bul 4 mlrd AQSh dollarynan kóp.
Sot qylmystyq top basshylarynyń shamamen 11 tonna metamfetamındi zańsyz óndirý men ótkizýge qatysy baryn rastady. Top músheleriniń kúsh qoldaný áreketteri saldarynan Qytaıdyń 6 azamaty qaza taýyp, birneshe adam túrli dárejede jaraqat alǵan.
2025 jylǵy 24 jeltoqsanda Gýandýn provıntsııasynyń Joǵarǵy halyq soty apellıatsııalyq shaǵymdardy qanaǵattandyrýsyz qaldyryp, úkimdi kúshinde qaldyrý týraly sheshim qabyldady jáne isti zań talaptaryna sáıkes QHR Joǵarǵy halyq sotynyń bekitýine joldady.
Sottalǵandardyń biri – Baı Sochen úkim oryndalmaı turyp aýrýdan qaıtys bolǵan.
Joǵarǵy sot úkimderdiń zańdylyǵyn jáne olardyń keltirilgen zalal men jasalǵan qylmystardyń aýyrlyǵyna saı ekenin rastady. Ólim jazasy Gýandýn provıntsııasyndaǵy Shenchjen qalasynyń soty arqyly, QHR Joǵarǵy halyq sotynyń sanktsııasymen oryndaldy.
Úkim oryndalar aldynda sottalǵandarǵa jaqyn týystarymen kezdesý múmkindigi berilgen.
Buǵan deıin Qytaıda alaıaqtyq pen kisi óltirý qylmystary úshin transshekaralyq qylmystyq toptyń 11 múshesi ólim jazasyna kesilgeni habarlanǵan bolatyn.