Qytaıda tolassyz jaýyn-shashyn jol qozǵalysyn buzyp, sý tasqyny qaýpin arttyrdy

ASTANA. KAZINFORM — Qytaıdyń ońtústigindegi Gýandýn provıntsııasynda jaýǵan nóser jaýyn avtokólik joldaryndaǵy qozǵalysty qıyndatyp, sý tasqyny qaýpin kúsheıtti, dep habarlaıdy Sınhýa.

Osyǵan baılanysty jergilikti bılik tótenshe jaǵdaıǵa den qoıý sharalaryn myqtap qolǵa aldy.

Provıntsııanyń kólik departamentiniń málimetinshe, seısenbi kúni saǵat 17:00–degi jaǵdaı boıynsha qatty jaýyn saldarynan úsh ýchaskede jyldamdyqty avtomagıstral, alty ýchaskede respýblıkalyq jáne provıntsııalyq mańyzy bar tasjol, sondaı-aq 25 aýylǵa aparar joly jabyq tur.

Zaqymdanǵan joldardy qalpyna keltirý úshin apattyq-qutqarý brıgadalary jiberildi.

Meteorologııalyq jáne gıdrologııalyq boljamdar jaýynnyń jalǵasatynyn jáne ózenderdegi sýdyń kóterilýin eskertkennen keıin, seısenbi kúni saǵat 14:00–de Gýandýn provıntsııasynda sý tasqynyna qarsy áreket etý deńgeıi 4 satyly júıeniń ekinshi deńgeıine deıin kóterildi.

Saǵat 10:00–degi jaǵdaı boıynsha provıntsııadaǵy 16 ózende sý deńgeıi qaýipti shekten asyp ketkeni belgili boldy.

Sınoptıkterdiń boljamynsha, Gýandýn provıntsııasynyń keıbir aýdandarynda jańbyr 6 tamyzda da jaýady, biraq 7 jáne 8 tamyzda birtindep báseńdeıdi.

Sonymen qatar, Gýansı-Chjýan avtonomııalyq aýdanynda da úsh gıdrologııalyq stantsııada sý deńgeıi qaýipti mejeden asyp tústi. Aımaqtyń gıdrologııalyq qyzmetiniń málimetinshe, Nankan ózenindegi Nankan stantsııasy 2017 jyldan bergi eń joǵary sý tasqynyn, al Ýlaıhe ózenindegi Sınlýn stantsııasy 2018 jyldan bergi eń joǵary deńgeıdegi sýdy tirkegen.

Osydan buryn Beıjińde nóser jaýynǵa baılanysty 82 myńnan astam adam evakýatsııalanǵanyn jazǵan edik.