Qytaıda tikushaq qulap, bir adam mert boldy
ASTANA. KAZINFORM – Qytaıdyń Tszıansý provıntsııasynyń Sýchjoý qalasynda tikushaq apatqa ushyrap, borttaǵy tórt adam jaralanyp, jerdegi bir adam qaza tapty. Bul týraly Lianhe Zaobao basylymy habarlady.
Basylymnyń jazýynsha, jergilikti ýaqyt boıynsha 2 mamyr kúni saǵat 17:00 shamasynda, R44Ⅱ úlgisindegi tikushaq (tirkeý nómiri B-7541) Ýchjýn aýdanynyń ústinen ushyp ótip bara jatqanda, on shaqty metr bıiktikten jerge qulaǵan.
Jergilikti tótenshe jaǵdaı, polıtsııa jáne densaýlyq saqtaý basqarmalary jedel sharalar qoldanyp, jaralanǵan tórt adamdy aýrýhanaǵa jetkizdi. Qazir olardyń ómirine qaýip tónip turǵan joq. Apattyń sebebin anyqtaý úshin Tszıansý provıntsııasynyń azamattyq avıatsııa basqarmasy tergeý jumystaryn júrgizip jatyr.
Tikushaq qulap túsken týrıstik nysannyń qyzmetkeri oqıǵany rastady. Onyń aıtýynsha, apatqa ushyraǵan tikushaq osy týrıstik mekemeniń seriktes uıymyna tán. Qazir demalys aımaǵy jabylyp, tıisti organdar tergeý júrgizip jatyr.
Buǵan deıin Qytaıdyń Lıaoıan qalasynda dámhanadaǵy órtten 22 adamnyń qaza tapqanyn jazǵan edik.