Qytaıda teńiz astyndaǵy eń uzyn avtojol týnnelin qazý aıaqtaldy
ASTANA. KAZINFORM — Qytaıda qalqandy ádispen eldegi eń uzyn teńizasty avtojol týnnelin qazý jumystary aıaqtaldy, dep habarlaıdy Sınhýa.
Qytaı temirjol qurylysy korporatsııasynyń málimetinshe, qalqandy mashına Shandýn provıntsııasyndaǵy Tszıaochjoý shyǵanaǵynyń teńiz túbinen 105 metr tereńdikte jobalyq mejege jetken.
Tszıaochjoý shyǵanaǵy arqyly ótetin ekinshi týnnel Tsındao qalasynyń ortalyq bóligin qalanyń Batys jaǵalaýy jańa aýdanymen baılanystyrady.
Jobanyń jalpy uzyndyǵy 17,48 shaqyrymdy quraıdy. Onyń 14,37 shaqyrymy negizgi týnnel ýchaskesine tıesili. Joba eki avtojol týnneli men olardyń arasyndaǵy qyzmettik týnnelden turady. Ár baǵytta úsh jolaq bolady. Kólik qozǵalysynyń eseptik jyldamdyǵy saǵatyna 80 shaqyrymǵa deıin jetedi.
Qytaı temirjol qurylysy korporatsııasynyń 14-bıýrosynyń ókili Van Tszıýnpınniń aıtýynsha, qurylys kezinde burǵylap-jarý jáne qalqandy ádisteri qoldanylǵan. Jumys shyǵanaqtyń shyǵys jáne batys jaǵalaýlarynan qatar júrgizilip, keıin týnnel ýchaskeleri sý astynda túıistirilgen.
Negizgi týnneldiń teńiz betinen eń tómengi tereńdigi 95 metr bolsa, qyzmettik týnnel 105 metr tereńdikte ornalasady. Mundaı tereńdikte qurylymǵa sý qysymy qatty áser etetindikten, týnneldiń germetıkalyǵy men gıdrooqshaýlaýyna joǵary talap qoıylady.
Nysanda topyraqty syrtqa shyǵarýdyń jańa júıesi alǵash ret qoldanyldy. Onyń quramyna burandaly konveıer, býnker jáne taý jynystaryn usatqysh kiredi. Van Tszıýnpınniń aıtýynsha, bul júıe jumys tıimdiligin arttyryp, jabdyqtyń bitelip qalý qaýpin azaıtqan. Sonymen qatar mamandar týnnel qazý kezinde qalqandy mashınany dirilden qorǵaıtyn tehnologııa ázirlegen. Bul jabdyqtyń turaqty jumys isteýine múmkindik beredi.
Qurylys aıaqtalǵannan keıin jańa týnnel Tszıaochjoý shyǵanaǵy arqyly ótetin qoldanystaǵy týnnel jáne kópirmen, sondaı-aq shyǵanaq mańyndaǵy avtojol ınfraqurylymymen birigip, Tsındaonyń ár aýdanyn baılanystyratyn kópdeńgeıli kólik júıesin qalyptastyrady.
Buǵan deıin shilde aıynda Qytaıdyń Kólik mınıstrligi 2026–2030 jyldarǵa arnalǵan 15-besjyldyq kezeńinde kólik júıesin damytý josparlaryn jarııalaǵan edi. 2030 jylǵa qaraı bılik zamanaýı kólik qyzmetteriniń júıesin negizinen qalyptastyrýdy kózdep otyr.
Jospar aıasynda kóliktiń ártúrli túrleriniń ózara baılanysyn jaqsartý, bir kólik túrinen ekinshisine aýysýdy jeńildetý jáne júk tasymalynyń tıimdiligin arttyrý kózdelgen. Sondaı-aq Qytaı týrıstik baǵyttardaǵy kólik ınfraqurylymyn damytýǵa, kólik toraptarynyń jumysyn jetildirýge jáne aýyldyq jerlerdegi jolaýshy, júk jáne kýrerlik qyzmetterdi jaqsartýǵa nıetti.
Buǵan deıin Dýbaıda Ilon Masktyń kompanııasy jobalaǵan jerasty týnnelderi salynatyny týraly habarlaǵan bolatynbyz.
