Qytaıda taıǵa tańba basý rásimi ótti
ASTANA. KAZINFORM – Qytaıdyń Іshki Mońǵol avtonomııalyq regıony Tonlıao qalasy Zalýt óńirinde taıǵa tańba basý rásimi ótti, dep habarlaıdy qytaılyq «Halyq gazeti».
Bul is-shara kóptegen shabandozdardy qyzyqtyrdy. Taıǵa tańba basý -mońǵol halqynyń ejelden kele jatqan dástúri. Ár kóktemde malshylar 2 jasar taılardyń «eseıý rásimin» ótkizedi. Bul kúni taılarǵa tańba basylyp, jal-quıryǵy kúzelip, úıirge qoıa beriledi. Bul onyń qulyn kúnimen qosh aıtyp, eseıgenin, at bolǵanyn bildiredi.
Tańba ádette jylqynyń jambasyna nemese aldyńǵy aıaǵyna basylady. Tańba olardyń jylqy túligine qosylýynyń jáne synǵa tolǵan sapaly mal ekeniniń belgisi sanalady. Sonymen qatar taıǵa mór basylǵannan keıin, kópshilik sol tańbadan jylqynyń kimniń maly ekenin ajyratyp otyrǵan.
Aıta keteıik, Qazaqta «Kúıgizbeseń kúıesiń» degen ataly sóz bar. Atam zamannan beri qazaq ásirese jylqy malyna rýdyń arnaıy bekitilgen tańbalaryn basyp keldi. Ata-babamyz jylqyny taıynda (jabaǵysynda) tańbalaǵan. Sodan da bolar anyq, aıqyn kórinip turǵan bógenaı-belgini «taıǵa tańba basqandaı» deıdi.
Eske sala keteıik, buǵan deıin Shyńjańda Janábil Symaǵululy el basqarǵan jyldary 733 qazaq mektebi bolǵany týraly jazǵamyz.