Qytaıda taıfýnǵa baılanysty «kók» deńgeıli eskertý jarııalandy

Juma kúni kúndiz Beıbý shyǵanaǵynda qalyptasqan tropıkalyq depressııa taıfýn deńgeıine deıin kúsheıdi. Osyǵan baılanysty Qytaıdyń Ulttyq meteorologııalyq ortalyǵy «kók» deńgeıli eskertý jarııalady.

Meteorologtardyń boljamynsha, juma túninen jeksenbige deıin taıfýn Beıbý shyǵanaǵynda bir orynda derlik turyp, birtindep kúsheıe túsedi. Ol kúshti tropıkalyq daýyl deńgeıine deıin jetýi múmkin.

Jeksenbige qaraǵan túni taıfýn soltústik-shyǵysqa qaraı saǵatyna 5-10 shaqyrym jyldamdyqpen baıaý jyljı bastaıdy dep boljanyp otyr. Gýandýn provıntsııasyndaǵy Leıchjoý túbeginiń batysynan Gýansı-Chjýan avtonomııalyq aýdanynyń ońtústik jaǵalaýyna deıingi aýmaqqa jaqyndaǵan saıyn onyń kúshi birtindep báseńdeıdi.

Juma kúni saǵat 20:00-den senbi kúni saǵat 20:00-ge deıin Beıbý shyǵanaǵynda, Ońtústik Qytaı teńiziniń basym bóliginde, Bashy buǵazynda, Taıvan aralynyń shyǵysyndaǵy teńiz aýmaǵynda, sondaı-aq Gýansı-Chjýan avtonomııalyq aýdany, Gýandýn jáne Haınan provıntsııalarynyń jaǵalaýynda qatty jel soǵady dep kútiledi.

Osy ýaqyt aralyǵynda Gýansı-Chjýan avtonomııalyq aýdanynyń, Haınan, Gýandýn, Fýtszıan jáne Chjetszıan provıntsııalarynyń keı aýdandarynda, sondaı-aq Taıvanda nóser jańbyr jaýady. Keı jerlerde jaýyn-shashyn óte mol túsýi múmkin.

Meteorologtar Haınanda, Gýansı-Chjýan avtonomııalyq aýdanynda jáne Taıvanda nóser jańbyrdyń yqtımal saldarynyń aldyn alý sharalaryn kúsheıtýge shaqyrdy. Al Qytaıdyń ońtústigindegi jaǵalaý aımaqtary men Ońtústik Qytaı teńizinde qatty jelge baılanysty qaýipsizdik sharalaryn qabyldaý usynyldy.

Eske salaıyq, buǵan deıin «Chan-Hom» taıfýny Úlken Tokıo aýmaǵyndaǵy 26,3 myńnan astam úıdi elektr qýatynsyz qaldyrǵanyn habarlaǵanbyp. Tabıǵı apat Japonııanyń soltústik-shyǵysyndaǵy áýe jáne qurlyq kóligi qatynasyna da kedergi keltirdi.