Qytaıda taıfýn saldarynan júzdegen áýe reısi toqtatyldy
ASTANA. KAZINFORM — Bıylǵy 13-taıfýn sanalatyn «Dolfın» Shyǵys Qytaıdaǵy Chjetszıan provıntsııasyna ekinshi ret jetip, Venchjoý qalalyq okrýgine qarasty ıÝetsın ýeziniń jaǵalaýyna soqqy berdi. Bul týraly Sınhýa agenttigi habarlady.
Bul týraly Qytaıdyń Ulttyq meteorologııalyq ortalyǵy málimdedi.
Mamandardyń málimetinshe, taıfýnnyń ortalyǵyna jaqyn jerde jeldiń jyldamdyǵy sekýndyna 38 metrge deıin jetken. Bul jeldiń 13 baldyq kúshpen soqqanyn bildiredi.
«Dolfın» Chjetszıan provıntsııasyna alǵash ret jeksenbi kúni saǵat 17:30 shamasynda jetken. Sol kezde taıfýn Taıchjoý qalalyq okrýgine qarasty ıÝıhýan ýeziniń jaǵalaýynda soqqan. Bul ýaqytta onyń ortalyǵyndaǵy jeldiń kúshi 14 balǵa deıin jetken.
Taıfýnnyń saldarynan Chjetszıan provıntsııasynyń ákimshilik ortalyǵy Hanchjoý qalasyndaǵy Sıaoshan halyqaralyq áýejaıynyń jumysy da shekteldi. Áýejaıda 388 ushyp keletin jáne ushyp shyǵatyn reıs toqtatyldy.
Qytaıdyń Ulttyq meteorologııalyq ortalyǵy tabıǵı apattan zardap shekken aýdandardaǵy jergilikti bılik organdaryna asa qatty nóser jaýynnan qorǵaný úshin qajetti sharalardy qabyldaýdy eskertti.
Eske salaıyq, buǵan deıin Bıylǵy 13-shi «Dolfın» taıfýny Qytaıdyń shyǵysyndaǵy Chjetszıan provıntsııasynyń jaǵalaýyna eki ret soqqy bergenin jazǵanbyz. Tabıǵı apatqa baılanysty júzdegen myń adam qaýipsiz jerge kóshirilip, myńnan astam áýe reısi toqtatyldy.
