Qytaıda taý tasqynynan 10 adam qaza taýyp, 33 adam iz-túzsiz joǵaldy
ASTANA. KAZINFORM — Qytaıdyń soltústik-batysyndaǵy Gansý provıntsııasynda taý tasqyny saldarynan 10 adam qaza taýyp, 33 adam iz-túzsiz joǵalyp ketti, dep habarlaıdy Sınhýa.
Gansý provıntsııasynyń ıÝıchjýn ýezinde jaýyn-shashyn saldarynan bolǵan taý tasqyny aýyr zardaptarǵa ákeldi. Jergilikti bıliktiń málimetinshe, juma kúni saǵat 15:30–daǵy jaǵdaı boıynsha 10 adam qaza taýyp, 33 adam izdestirilip jatyr.
Beısenbi keshke nóser jaýyn Lanchjoý qalasyna qarasty ıÝıchjýn jáne ózge de aýdandarǵa jaýǵan. Juma kúni túske deıin jaýyn-shashyn mólsheri 220,2 mm-ge deıin jetken. ıÝıchjýn ýezindegi birneshe aýyl qatty zardap shekken.
Juma kúni saǵat 14:00 shamasynda Chengýan kentindegi Sınlýn bastaýysh mektebiniń janynda sel sýy tamyrynan julynyp ketken aǵashtarmen aralasyp, joldardy bógep tastaǵany habarlandy.
Keıbir jerlerde balshyqtyń tereńdigi 30 sm-den asqan. Jol jıeginde kóptegen kólik búlingen, al keıbir úılerdiń birinshi qabatyndaǵy jıhaz tasqyn sýmen tolyqtaı aǵyp ketken.
Aımaqqa 2 700-den astam qutqarýshy, 980 tehnıka jáne 8 530 dana alǵashqy kómek zattary jiberilgen. Qazir oqıǵa ornynda qutqarý, ınfraqurylymdy qalpyna keltirý, evakýatsııa jáne turǵyndardy ornalastyrý jumystary júrip jatyr.
QHR tóraǵasy Sı Tszınpın Gansý provıntsııasynda bolǵan taý tasqynyna baılanysty izdestirý-qutqarý jumystaryn barynsha jedeldetýdi, sondaı-aq sý tasqyndarynyń aldyn alyp, tabıǵı apattardyń saldaryn joıý boıynsha barlyq qajetti sharalardy qabyldaýdy tapsyrdy.
Sı Tszınpın sońǵy ýaqytta jıilep ketken qolaısyz aýa raıyna baılanysty barlyq óńirler men tıisti organdardy táýekelderdi boljaý men erte eskertý júıesin kúsheıtýge, jasyryn qaýipterdi anyqtap, ýaqtyly joıýǵa, kezekshilik pen tótenshe jaǵdaılarǵa jedel den qoıý tártibin kúsheıtýge, sý tasqynyna qarsy is-sharalardy naqty ári úılesimdi júrgizýge shaqyrdy. Ol tasqyn sý maýsymynda halyqtyń qaýipsizdigin qamtamasyz etý – basty mindetterdiń biri ekenin atap ótti.
Buǵan deıin Qytaıdyń ońtústigindegi Gýandýn provıntsııasynda ornalasqan Gýanchjoý qalasynyń Baııýn aýdanynda sársenbi kúni nóser jańbyr saldarynan kóshkin júrip, 14 adam úıindi astynda qalǵany habarlandy.