Qytaıda tamyz aıynda halyqaralyq Big Data ındýstrııasy kórmesi ótedi
ASTANA. KAZINFORM — 12-shi Qytaı halyqaralyq Big Data ındýstrııasy kórmesi /Big Data Industry Expo/ 2026 jyldyń tamyzynda Qytaıdyń ońtústik-batysyndaǵy Gýıchjoý provıntsııasynyń ákimshilik ortalyǵy Gýııan qalasynda ótedi. Bul týraly beısenbi kúni jergilikti bılik ókilderi habarlady, dep jazady Sınhýa.
Big Data Industry Expo — álemdegi úlken derekter taqyrybyna arnalǵan alǵashqy halyqaralyq kórme. 2015 jyly qurylǵannan beri bul shara jahandyq tsıfrlyq ekonomıkanyń damýyndaǵy jańa úrdisterdi tanystyrý alańyna jáne sala jetistikterimen almasýdyń negizgi platformasyna aınaldy.
2026 jylǵy kórmeni Qytaıdyń Memlekettik derekter basqarmasy men Gýıchjoý provıntsııasynyń úkimeti birlesip uıymdastyrady. Іs-shara 6 negizgi sektsııadan turady, al kásibı kórme alańdarynyń jalpy aýdany 60 myń sharshy metrdi quraıdy.
Gýııan qalasy ózin ulttyq deńgeıdegi esepteý qýaty bazasyna jáne Qytaıdyń batysyndaǵy tsıfrlyq ekonomıka ınnovatsııalyq ortalyǵyna aınaldyrý baǵytynda belsendi jumys júrgizip jatyr, dedi qala ákiminiń orynbasary Fý Tao.
Qazirgi tańda qalada 27 iri jáne asa iri derekter ortalyǵy jumys isteıdi. Olardyń jıyntyq esepteý qýaty 165 ekzaflopstan asady, onyń 98%-dan astamy jasandy ıntellekt negizindegi esepteýlerge tıesili. Lokalızatsııa deńgeıi 90%-ǵa jetken. Osylaısha Gýııan Qytaıdaǵy eń qýatty esepteý resýrstary shoǵyrlanǵan aımaqtardyń birine aınalǵan.
Budan buryn habarlanǵandaı, Qytaıda kıberkeńistikke qatysty 180-nen astam zań men normatıvtik akt kúshine endi.
