Qytaıda taǵy bir sheneýnik para alǵany úshin ólim jazasyna kesildi
ASTANA. KAZINFORM – Qytaıdyń Shyńjań Uıǵyr avtonomııalyq regıony partııa komıtetiniń hatshysynyń burynǵy orynbasary Lı Pensın 822 mıllıon ıýannan astam para aldy dep aıyptalyp, ólim jazasyna kesildi.
Lianhe Zaobao basylymynyń habarlaýynsha, Qytaı soty 22 sáýir kúni Lı Pensınniń para alý isi boıynsha birinshi satydaǵy aıyptaý úkimin jarııalady. Úkimge sáıkes, qytaılyq sheneýnikke asa iri kólemde para alǵany úshin ólim jazasy berilip, qosymsha saıası quqyqtarynan ómir boıyna aıyrý jáne búkil mal-múlkin tárkileý jazasy taǵaıyndaldy. Sot sheshimimen ólim jazasynyń oryndalýy eki jyl merzimge keıinge qaldyryldy.
Eki jyldan keıin, sot sheshimimen ólim jazasy ómir boıy bas bostandyǵynan aıyrý jazasyna aýystyrylǵan jaǵdaıda, oǵan merziminen buryn bosatylý nemese jazasyn jeńildetý múmkindikteri qarastyrylmaıdy.
Tergeý barysynda anyqtalǵan jáne tárkilengen zańsyz múlki men tabysy memlekettik bıýdjetke aýdarylady.
Sottyń anyqtaýynsha, 1999 jyldan 2023 jylǵa deıin túrli deńgeıde laýazymdy qyzmetter atqarǵan Lı Pensın óz ókilettigi men jumys babyndaǵy ońtaıly jaǵdaıdy paıdalanyp, birqatar mekeme men jeke tulǵalarǵa ken oryndaryn ıgerý, kásipkerlikpen aınalysý jáne kadrlyq aýys-túıis boıynsha «kómektesip», qarymjysyna tikeleı nemese aradaǵy adam arqyly 822 mıllıon ıýannan astam zańsyz qarajat alǵan.
65 jastaǵy Lı Pensın — Shansı provıntsııasynyń týmasy. Ol Qytaıdyń Tsınhaı, Іshki Mońǵolııa jáne Shyńjań óńirlerinde birneshe jyl boıy túrli deńgeıde basshylyq qyzmetter atqarǵan. Ásirese 2016 jyly ShUAR partııa komıtetiniń hatshysynyń orynbasary bolyp taǵaıyndalyp, partııa komıteti hatshylyǵynyń jetekshisi jáne bilim isi jónindegi jumys komıtetiniń hatshysy qyzmetin qosa atqarǵan. Osy kezeńde ıdeologııa jáne bilim salasyndaǵy separatızmge qarsy kúres naýqanyna jetekshilik etken.
2021 jyldyń shilde aıynda basqa jumysqa aýystyrylǵan. 2023 jyldyń jeltoqsan aıynda onyń ústinen tártiptik is qozǵalyp, 2024 jyly maýsymda partııa qatarynan shyǵarylǵan.
Buǵan deıin mıllıon oqyrmany bar qytaılyq eks-sheneýniktiń isti bolǵany jaıly jazyp edik.