Qytaıda taǵy bir qandasymyz qysqy Azııa oıyndarynyń júldegeri atandy
HARBIN. KAZINFORM – Qytaıda týyp-ósken taǵy bir qandasymyz Qanaǵat Muhammeduly konkımen júgirýden IX qysqy Azııa oıyndarynyń júldegeri atandy.
Naqtyraq aıtsaq, Harbınde ótip jatqan qysqy Azııada oıyndarynda Qytaı quramasynyń atynan synǵa túsip jatqan Qanaǵat Muhammeduly 5000 metr qashyqtyqqa konkımen júgirýden qola medalǵa qol jetkizdi.
Ol atalǵan qashyqtyqty 6:31.54 sekýndta júgirip ótti. Bul saıys túrinen barlyq júldeni jarys qojaıyndary qanjyǵalaryna baılady. Atap aıtsaq, altyn júldeni Qanaǵat Muhammedulynyń komandasy Vý Iıý 6:27.81 nátıjesimen jeńip alsa, kúmis medalǵa taǵy bir qytaılyq sportshy Lııý Hanbın enshiledi. Ol atalǵan qashyqtyqty 6:29.93 ýaqyt kórsetkishimen baǵyndyrdy.
Aıta keteıik, Qanaǵat Muhammeduly Qytaıdyń Shyńjań-Uıǵyr avtonomııalyq aýdanyna qarasty Altaı aýylynda 1999 jyly dúnıege kelgen.
Esterińizge sala ketsek, osyǵan deıin Qytaıda týyp-ósken taǵy bir qandasymyz Samǵar Serikuly erler arasynda shańǵymen syrǵanaýdan sprınt baǵdarlamasynda qola medal jeńip alǵanyn jazǵan edik.
Sondaı-aq, shańǵy jarysynan áıelder arasynda 5 shaqyrymǵa syrǵanaýdan (erkin stıl) qytaıda turatyn qazaq qandasymyz Baıan Jalynqyzy chempıon atanǵan edi.
