Qytaıda tabıǵı apattan zardap shekken óńirlerge 170 mln ıýan bólindi

ASTANA. KAZINFORM — Qytaıdyń Qarjy mınıstrligi men Tótenshe jaǵdaılardy basqarý mınıstrligi tabıǵı apattardyń saldaryn joıý úshin eldiń jeti óńirine 170 mıllıon ıýan (shamamen 23,8 mıllıon AQSh dollary) kóleminde qarjy bóldi.

Bul týraly Sınhýa habarlady.

9 tamyzdan bastap Qytaıdyń ońtústik-batysyndaǵy Sychýan provıntsııasy men Chýntsın qalasynan bastap, shyǵystaǵy Tszıansý men Anhoı provıntsııalaryna deıingi keń aýmaqta tolassyz jaýyn jaýyp, sý tasqyny men geologııalyq apattarǵa ákep soqtyrdy.

Qarjy Tszıansý, Anhoı, Hýbeı, Sychýan, Gýıchjoý, Gansý provıntsııalary men Chýntsın qalasyna bólindi. Ol qarajat apattan zardap shekken halyqty evakýatsııalaý, ornalastyrý, izdestirý-qutqarý jumystaryn júrgizý, qaıtalanýy múmkin qaýipterdiń aldyn alý, turǵyn úılerdi qalpyna keltirý sııaqty sharalarǵa baǵyttalady.

Osyǵan deıin habarlanǵandaı, Gansý provıntsııasynda taý tasqyny saldarynan 10 adam qaza taýyp, 33 adam iz-túzsiz joǵalyp ketkenin jazǵan edik. Keshe Gansý provıntsııasynda tasqynnan kóz jumǵandar sany 15 adamǵa jetkeni belgili boldy.

Qytaı úkimeti tórt kún buryn sý tasqynynan zardap shekken aımaqtardaǵy joldardy shuǵyl qalpyna keltirý jumystaryna ortalyq úkimet bıýdjetinen 70 mıllıon ıýan (shamamen 9,81 mıllıon AQSh dollary) bólgenin málim etti.

Sonymen qatar ıÝıchjýn ýezinde jeksenbi kúni taý tasqyny saldarynan zaqymdanǵan joldar men elektr jelileri jóndelgeni habarlandy.