Qytaıda sý tasqyny saldarynan 80 myńnan astam adam evakýatsııalandy
ASTANA. KAZINFORM — Qatty jáne tolassyz jaýǵan jańbyr men ózenderdiń joǵarǵy aǵysynan kelgen sý kóleminiń artýy Qytaıdyń ońtústik-batysyndaǵy Gýıchjoý provıntsııasynyń eki ýezinde kúshti sý tasqynyna ákelip soqty, dep jazady Sınhýa.
Bul jergilikti turǵyndardy jappaı evakýatsııalaýǵa májbúr etti.
Seısenbi kúni saǵat 14:30–daǵy málimet boıynsha Jýntszıan jáne Tsýntszıan ýezderinde tıisinshe 48 900 jáne 32 000 adam ýaqytsha evakýatsııalandy. Eki ýezde de sý tasqynyna baılanysty tótenshe jaǵdaıǵa áreket etý deńgeıi eń joǵary — birinshi deńgeıge kóterildi.
Jýntszıan ýezi, «Tsýnchao» dep atalatyn aýyldyq fýtbol lıgasymen tanymal. Bul lıga 100-den astam aýyldyq jáne qalalyq komandalardy biriktiredi jáne eldiń túkpir-túkpirinen jankúıerlerdi tartady. Osy ýezge dúısenbi kúni saǵat 20:00–den bastap nóser jaýyn jaýǵan. Seısenbi kúni saǵat 14:00–degi málimet boıynsha Dýlıýtszıan ózenindegi bir gıdrologııalyq stantsııada sý deńgeıi qaýipti mejeden asyp, 6,68 metrge jetken.
«Tsýnchao» lıgasynyń matchtary ótetin fýtbol alańyn shamamen úsh metr tereńdikte sý basqan.
Fýtbol alańynyń mańynda turatyn jergilikti turǵyn Lýn Tıan seısenbi kúni tańǵy 8-de oıanǵanda, úıiniń birinshi qabatynda sý beline deıin kóterilgenin aıtty.
— Sý óte jyldam kóterildi, sol sebepti men úshinshi qabatta qutqarýshylardy kúttim. Tústen keıin meni qaýipsiz jerge jetkizdi, — dedi Lýn Tıan.
Qutqarý jumystaryna órt sóndirýshiler men eriktilerden quralǵan toptar tartylyp, olar eki ýezde de qaıyqtar men arnaıy jabdyqtardy paıdalandy.
Seısenbi kúni saǵat 16:00–degi málimet boıynsha Gýıchjoý provıntsııasynyń tótenshe jaǵdaılardy basqarý departamenti atalǵan eki ýezge temirjol jáne tas jol arqyly tótenshe jaǵdaı kezinde kómekke qajetti zattar jóneltti. Onyń ishinde 30 myń bótelke aýyz sý jáne 10 myńnan astam qaptama jedel daıyndalatyn kespe bar.
Buǵan deıin habarlanǵandaı, Qytaıdyń Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıǵanyn habarlaǵan edik.