Qytaıda tasqyn men daýyldan 10 adam qaza taýyp, ondaǵan myń turǵyn zardap shekti
ASTANA. KAZINFORM — Qytaıdyń ońtústigindegi Gýansı-Chjýan avtonomııalyq aýdanyndaǵy Nannın qalalyq okrýginde nóser jaýynnan keıingi sý tasqyny men birneshe sý qoımasy bógetteriniń buzylýy saldarynan eki adam qaza taýyp, shamamen 55 myń adam apat aımaǵynda qaldy.
Sınhýa agenttiginiń deregine sáıkes, bul týraly jergilikti bılik dúısenbi kúni ótken baspasóz máslıhatynda málimdedi.
Sheneýnikterdiń aıtýynsha, tabıǵı apattan zardap shekken aýdandardan jalpy sany 48 myń adam qaýipsiz jerge kóshirilgen.
4 shilde saǵat 08:00-den 6 shilde saǵat 11:00-ge deıin «Maısak» taıfýnynyń áserinen Nannın qalalyq okrýginiń basym bóligine nóser jańbyr quıdy. Dúısenbi kúni saǵat 20:00-degi jaǵdaı boıynsha Gýansı-Chjýan avtonomııalyq aýdanyndaǵy 59 ózendegi sý deńgeıi qaýipti mejeden asty.
Nannın qalasynyń Tótenshe jaǵdaılardy basqarý bıýrosy basshysynyń orynbasary Hýan Lý dúısenbi kúni saǵat 20:00-degi jaǵdaı boıynsha apat bolǵan aýdandarda sý deńgeıiniń tómendeý belgileri baıqala bastaǵanyn aıtty. Sonymen qatar sý basý qaýpi bar aýyldarda turǵyndardy erte eskertý jáne evakýatsııalaý jumystary jalǵasyp jatyr.
Sol kúni Qytaıdyń Tótenshe jaǵdaılardy basqarý mınıstrligi Gýansı-Chjýan avtonomııalyq aýdanyna 150 myń dana shuǵyl gýmanıtarlyq kómek jiberilgenin habarlady. Qazir óńirde Nannın jáne Gýıgan qalalyq okrýgterin qamtyǵan nóser jaýynnan keıingi sý tasqynynyń saldaryn joıý jumystary jalǵasyp jatyr.
Dúısenbi kúni Qytaıdyń Sý resýrstary mınıstrligi Gýansı-Chjýan avtonomııalyq aýdanyndaǵy sý tasqynyna baılanysty tótenshe áreket etý deńgeıin úshinshi deńgeıden ekinshi deńgeıge kóterdi.
Sonymen qatar Ortalyq Qytaıdaǵy Hýbeı provıntsııasynyń shyǵys bóliginde dúısenbi kúni keshke kúshti konvektıvti aýa raıy qubylystary saldarynan bolǵan naızaǵaı men qatty jelden segiz adam qaza taýyp, taǵy bir adam iz-túzsiz joǵaldy. Bul týraly provıntsııalyq Tótenshe jaǵdaılardy basqarý departamentiniń málimetinde aıtyldy.
Dúısenbi kúni saǵat 19:00 men 23:00 aralyǵynda Hýanshı, Hýangan, Echjoý jáne Sıannın qalalarynda naızaǵaı oınap, qatty jel soqty. Eki kenttik jáne aýyldyq ákimshilik birlikte jeldiń ekpini 13 ballǵa deıin jetse, keıbir kentter men aýyldarda tornado tirkeldi.
Jergilikti oqıǵa ornyndaǵy qutqarý shtabynyń seısenbi kúni habarlaýynsha, Hýangan qalasyndaǵy Hýanchjoý aýdanynyń úsh shaǵynaýdany kenetten bolǵan kúshti konvektıvti aýa raıynan qatty zardap shekken.
Seısenbi kúni tańǵy saǵat 05:00-degi jaǵdaı boıynsha atalǵan úsh shaǵynaýdanda 275 adam zardap shekti. Jalpy 408 turǵyn qaýipsiz jerge evakýatsııalandy. Qazir óńirde izdestirý-qutqarý jumystary jalǵasyp jatyr.
Buǵan deıin Qytaıdyń jer silkinisinen zardap shekkenderge jibergen alǵashqy gýmanıtarlyq kómegi Venesýelaǵa jetkenin jazǵanbyz.
