Qytaıda sırek kezdesetin qaterli isik túrine qarsy alǵashqy otandyq preparat maquldandy

ASTANA.KAZINFORM — Qytaıdyń Jiangsu Hengrui Pharmaceuticals kompanııasy onkologııalyq aýrýlardy emdeýge arnalǵan jańa Zeprumetostat preparatyna QHR Memlekettik dári-dármekter men taǵam ónimderin baqylaý basqarmasynan shartty túrde ruqsat aldy, dep habarlaıdy Kazinform tilshisi China Daily-ge silteme jasap.

Preparat retsıdıvti nemese emge kónbeıtin perıferııalyq T-jasýshalyq lımfomasy (R/R PTCL) bar, júıeli terapııadan kem degende bir kýrs ótken eresek naýqastardy emdeýge ruqsat etildi. Bul — qan qaterli isiginiń sırek ári agressıvti túri, ony emdeýdiń balamalary óte shekteýli.

Zeprumetostat — Qytaıda ázirlengen EZH2 fermentiniń alǵashqy ıngıbıtory. Bul ferment rak jasýshalarynyń ósýimen baılanysty. Kompanııanyń málimetinshe, bul — jańa emdeý múmkindikterin usynýǵa qabiletti selektıvti peroraldi (aýyz arqyly qabyldanatyn) preparat.

Shartty ruqsat aıasynda preparat qazirdiń ózinde naryqqa shyǵýy múmkin, biraq uzaq merzimdi qaýipsizdigi men tıimdiligin baǵalaý úshin klınıkalyq zertteýler jalǵasýy tıis. Mundaı ruqsat eger aldyn ala nátıjeler naýqastar úshin eleýli paıda kórsetse, aýyr jáne sırek aýrýlarǵa qoldanylady.

Buǵan deıin Qazaqstan men Qytaı onkologııany dıagnostıkalaý jáne emdeý salasynda birlesip jumys isteıtini habarlanǵan edi.

Al Qazaqstan ǵalymdarynyń onkologııaǵa qarsy dárisin shyǵarý úshin qansha aqsha kerek ekenin myna siltemeden oqyńyz.