Dımash araǵa jeti jyl salyp Singer án baıqaýynyń sahnasyna qaıta oraldy
ASTANA. KAZINFORM — Qazaqstandyq ánshi Dımash Qudaıbergen araǵa 7 jyl salyp «Singer 2024» án baıqaýynyń sahnasyna oraldy. Konkýrsta Dımashpen birge án salǵan úmitker fınalǵa ótpeı qaldy.
Baıqaý shartyna sáıkes, Dımash jobanyń aqtyq básekesinde amerıkalyq tanymal ánshi Shante Torreın Mýrmen birge óner kórsetip, Lose Control ánin shyrqady.
Ókinishke qaraı, Shante Mýr fınaldyq básekeniń ekinshi kezeńine ótpeı qaldy.
Al ádilqazy sheshimi qytaılyq áleýmettik jelide jankúıerlerdiń narazylyǵyna ushyrady.
Sondaı-aq, olar jeńimpazdy telekórermenderdiń daýys berýi arqyly tańdaý kerek degen pikir aıtyp jatyr.
Weibo áleýmettik jelisi qoldanýshylarynyń aıtýynsha, «álemge tanymal qos ánshiniń óneri — keshtiń eń jarqyn sáti boldy, al Shante Mýrdyń kelesi kezeńge ótpeýi tipten aqylǵa syımaıdy».
Aıta keteıik, Shante Torreın Mýr — amerıkalyq ánshi, aktrısa jáne telejúrgizýshi.
Shante Mýrdyń debıýttik stýdııalyq albomy «Precious» 1992 jyly jaryqqa shyǵyp, Amerıkanyń dybys jazý ónerkásibi qaýymdastyǵynyń (RIAA) altyn sertıfıkatyna ıe bolǵan.
Ol sondaı-aq eki ret Gremmıge úmitker retinde usynyldy.
Buǵan deıin habarlaǵanymyzdaı, qazaqstandyq ánshi Rýhııa Baıdúken Qytaıdaǵy «Singer 2024» baıqaýynyń 8-kezeńinde óner kórsetip, kelesi kezeńge óte almaǵan bolatyn.
Eske salaıyq, Dımash Qudaıbergen «Singer 2017» baıqaýynda ekinshi oryn ıelengen edi.
